Yangiliklar

Oʻzsanoatqurilishbank aksiyadorlari umumiy yigʻilishi boʻlib oʻtdi

Joriy yilning 24-iyun kuni Oʻzsanoatqurilishbank faoliyatining 2021-yil yakunlariga bagʻishlangan aksiyadorlar umumiy yigʻilishi boʻlib oʻtdi. Unda Bank Boshqaruvi aʼzolari, aksiyadorlar hamda tegishli tarkibiy tuzilmalar rahbarlari ishtirok etdi.

Mamlakatimizda moliya sohasini izchil isloh qilish jarayonida qator chora-tadbirlar amalga oshirildi. Ilgʻor bank ishini yuritish va bu boradagi raqobat muhitini mustahkamlash uchun zarur huquqiy sharoitlar yaratildi.

Xususan, davlatimiz rahbari boshchiligida ishlab chiqilgan 2020-2025-yillarga moʻljallangan Oʻzbekiston Respublikasining bank tizimini isloh qilish strategiyasi tijorat banklari moliyaviy barqarorligini oshirishga, bozor tamoyillari asosida kreditlashni joriy etishga, banklarni ularga xos boʻlmagan funksiyalardan ozod qilib, masofaviy xizmatlarni kengaytirishga xizmat qilmoqda.

Yigʻilishda soʻzga chiqqan “Oʻzsanoatqurilishbank” ATB Boshqaruv raisi S.Annaklichev ushbu strategiyaga asosan Xalqaro moliya korporatsiyasi bilan hamkorlikda amalga oshirilgan transformatsiya jarayonlari, mijozlarga yoʻnaltirilgan bank biznesi, muassasani xususiylashtirishga tayyorlash va investitsiya jozibadorligini oshirishda salmoqli natijalarga erishilganligini taʼkidladi.

Qayd etilganidek, mazkur davrda bank sof foydasi 2020-yilga nisbatan 25 foizga oshib, tijorat banklari orasida 1-oʻrinni egalladi. Bank aktivlarining rentabelligi 2 foizni, kapital rentabelligi 13,8 foizni tashkil qildi. Bank kapitali 1,15 barobarga, depozit bazasi esa 1,1 barobarga oshdi. Korporativ hamda kichik va oʻrta biznesga jami 17 trln. soʻmlik kreditlar ajratildi.

Bank aktivlarining rentabelligi 2 foizni, kapital rentabelligi 13,8 foizni tashkil qildi. Bank kapitali 1,15 barobarga, depozit bazasi 1,1 barobarga, foizsiz daromadlari esa 1,3 barobarga oshdi.

Hisobot yilida jami 17 trln. soʻm, jumladan, korporativ biznesga 11,8 trln. soʻm, kichik va oʻrta biznesga 3,4 trln. soʻm hamda chakana savdoni kreditlashga 1,6 trln. soʻm hajmida kreditlar ajratildi. Natijada 17200 ta yangi ish oʻrni yaratildi.

Jismoniy shaxslar uchun ishga tushirilgan “JOYDA” mobil ilovasidan foydalanuvchilar soni qariyb 3 barobarga ortgani va xizmatlar soni 65 taga yetkazilgani hisobiga xizmatlar koʻrsatish hajmi keskin oʻsdi. Faol mijozlar soni 402 ming nafarga yoki 1,8 barobarga oshib, 883 ming nafarni tashkil etdi. Ushbu koʻrsatkichlar bankning masofaviy xizmatlar koʻrsatish boʻyicha bozor ulushini 11,7 foizdan 13 foizga oshirishga omil boʻldi.

Bank faoliyatini mijozlarga yoʻnaltirish maqsadida aholi uchun qator yangi xizmatlar joriy qilindi. Chakana mijozlar alohida segmentlarga ajratildi. Xorijga pul oʻtkazmalarini oʻtkazish uchun SWIFT GPI tizimi ishga tushirildi. Mijozlarga istalgan tarmoqdan xizmat koʻrsatishni yoʻlga qoʻyish maqsadida yagona MFO tizimini joriy qilish ishlari boshlab yuborildi. Bank xizmatlari markazlari soni 46 taga, smart-ofislar soni 97 taga yetkazildi.

Yigʻilishda hisobot davrida Xalqaro moliya korporatsiyasining tajribali ekspertlari bilan hamkorlikda transformatsiya jarayonlarining uchinchi bosqichi boʻyicha amalga oshirilgan ishlar samarali kechgani aytib oʻtildi.

Transformatsiya jarayonlarini bank filiallari tarmogʻida joriy etish ishlari Buxoro viloyatida muvaffaqiyatli yoʻlga qoʻyilgani taʼkidlandi.

Buxoro mintaqaviy filiali tuzilishi va shtatlari oʻzgartirildi, back ofis ishi markazlashtirildi, filiallar savdo nuqtalariga aylantirildi, jarayonlar optimallashtirildi, xodimlar malakasi oshirildi, ular faoliyati unversallashtirildi.

BIG DATA texnologiyasiga asoslangan DWH maʼlumotlarni yigʻish va tahlil qilish tizimi ishga tushirildi.

Xavf darajasi yuqori boʻlgan mijozlar uchun buxgalteriya hisobi yoʻlga qoʻyilgan.

Strukturalashtirilgan moliyalashtirish tizimi asosida korporativ mijozlarning 258 mln. dollarlik loyihalari moliyalashtirildi. Kichik va oʻrta biznes subyektlari uchun alohida ball tizimi joriy etildi.

Mijozlarga istalgan tarmoqdan xizmat koʻrsatishni yoʻlga qoʻyish maqsadida yagona MFO tizimini joriy qilish ishlari boshlab yuborildi. Xalqaro pul oʻtkazmalarining barcha turlari bankning yangi axborot tizimiga integratsiya qilindi. Bank xizmatlari markazlari soni 46 taga, smart-ofislar soni 97 taga yetkazildi.

2021-yilda xodimlarni tayyorlash va malakasini oshirish boʻyicha ishlar yana bir malaka darajasiga koʻtarildi.

Bankning oʻquv markazida 3216 nafar xodim kasbga yoʻnaltirilgan 159 ta kursda oʻqitildi. 4 nafar xodim “El-yurt umidi” jamgʻarmasi stipendiyasiga ega boʻldi. Shuningdek, Sberbank korporativ universiteti bilan 25 ta modulli trening doirasida xodimlarni tayyorlash boʻyicha memorandum imzolandi. Jamoa xodimlarini ragʻbatlantirish va qoʻllab-quvvatlash maqsadida “SQB Kaizen Teams”, “SQB Zakovat”, “SQB bookchallenge”, “SQB ayollar klubi” loyihalari ishi davom ettirildi.

Toshkent shahridagi Inha universitetida SAP kompaniyasi bilan hamkorlikda tashkil etilgan Moliyaviy texnologiyalar laboratoriyasida bankni avtomatlashtirish jarayonlarini yanada oshirish uchun dasturchilarni tayyorlash ishlari davom ettirilmoqda.

Tadbirda bankning 2021-yilgi yutuqlariga alohida toʻxtalindi.

Qayd qilinishicha, 2021-yilda Oʻzsanoatqurilishbank faoliyati qator xalqaro baholovchi tashkilotlar va ekspertlar tomonidan bir necha bor eʼtirof etilgan.

“Standard & Poor’s” va “Fitch Ratings” xalqaro reyting agentliklari bankning xalqaro reytingini “VV –” darajasida tasdiqlagan.

CERT xalqaro standartlashtirish tashkiloti bilan birgalikda korrupsiyaga qarshi kurashning yangi tizimi yaratilgan.

Yashil banking sohasida atrof-muhitni muhofaza qilishga qaratilgan jami 90 mln. AQSH dollariga teng energiya tejovchi 105 ta loyiha moliyalashtirildi. Ekologik va ijtimoiy xavflarni boshqarish tizimi joriy etildi.

Muammoli kreditlarni undirish uchun “SOFT COLLECTION” tizimi ishga tushirildi.

Bundan tashqari, bank tomonidan Prezidentimizning 2021-yil 9-iyundagi “Hududlarning sanoat salohiyatini oshirishga doir qoʻshimcha chora-tadbirlar toʻgʻrisida”gi farmoniga asosan qurilish materiallari sanoatini rivojlantirish maqsadida qator ishlar olib borildi. Bu borada Boston Consulting Group konsalting kompaniyasi bilan hamkorlikda sohani 2030-yilgacha rivojlantirish strategiyasi ishlab chiqildi, hududlarda qurilish materiallari ishlab chiqarishni rivojlantirish boʻyicha 13 markaz tashkil etildi.

Yigʻilishda bankni xususiylashtirish yoʻlida olib borilayotgan ishlar xususida ham axborot berildi.

Oʻzbekiston Respublikasi Vazirlar Mahkamasining 2021-yil 28-dekabrdagi “Oʻzsanoatqurilishbank” aksiyadorlik tijorat bankini xalqaro moliya korporatsiyasi ishtirokida xususiylashtirish va transformatsiya qilish chora-tadbirlari toʻgʻrisida” qaroriga oʻzgartirish va qoʻshimchalar kiritish toʻgʻrisida”gi qaroriga koʻra, Bankni xususiylashtirish boʻyicha tasdiqlangan yoʻl xaritasi asosida tizimli chora-tadbirlar amalga oshirilayotgani qayd etildi.

Yigʻilish kun tartibiga koʻra, Bankning joriy yilga moʻljallangan rejalari ham muhokama etildi. Bunda 20dan ortiq masalalar yuzasidan tegishli qarorlar qabul qilindi.

Bank Axborot xizmati

Вернуться назад

726

Другие новости