Yangiliklar

Toshkentda Oʻzsanoatqurilishbankning Oʻquv va IT markazlari ochildi

Oʻzsanoatqurilishbank tomonidan yangicha qiyofa va yangi ish uslubida Oʻquv va IT markazlar faoliyati yoʻlga qoʻyildi. Bunda xodimlar uchun xavfsiz va zamonaviy mehnat sharoitlarini yaratish bilan birga qulay ijodiy muhitni hozirlash maqsadi ilgari surildi.

2020-2025-yillarga moʻljallangan Oʻzbekiston Respublikasining bank tizimini isloh qilish strategiyasida kadrlar salohiyatini oshirish, xususan, kadrlarni boshqarishning korporativ strategiyasini takomillashtirish, kadrlarini uzluksiz oʻqitish tizimini joriy qilish, bunda yetakchi xorijiy banklar va konsultantlar bilan hamkorlik qilish masalalari alohida oʻrin olgan.

Shuningdek, strategiyaga koʻra, Bank tizimiga zamonaviy servis yechimlari asosida axborot va moliyaviy texnologiyalarni keng joriy etish, axborot xavfsizligini lozim darajada taʼminlash, onlayn xizmat koʻrsatishga asoslangan turli dasturiy taʼminotlar yaratish talab etilmoqda.р

Shu bois Oʻzsanoatqurilishbank tizimida ushbu ikki yoʻnalishga katta eʼtibor qaratilgan holda yangi maqsad va vazifalar bilan zamonaviy uslubda Oʻquv va IT markazlar ish boshladi.

– Taraqqiyotning har bosqichida inson omili oʻz dolzarbligini yoʻqotmay kelmoqda, – deydi ochilish marosimida soʻz olgan “Oʻzsanoatqurilishbank” ATB Boshqaruv raisi Saxi Annaklichev. – Hatto, bugungi raqamlashtirish jarayonida ham har qanday yangilik bevosita kadrlar kuchi bilan yuzaga kelmoqda. Shuning uchun Bank tizimini transformatsiya qilish jarayonida ushbu ikki yoʻnalishda ham boshqaruv tizimi va shart-sharoitlarni anchayin takomillashtirishga harakat qildik.

Binoning birinchi qavatida Oʻquv markazi, ikkinchi qavatida esa IT markaz oʻrin olgan boʻlib, har ikki qavat ham zamonaviy arxitektura uslubida barpo etilgan. Хonalar koʻrkam mebel, inventar jihozlar hamda texnologik vositalar bilan jihozlangan. Sport-sogʻlomlashtirish xonasi tashkil etilgan.

Oʻquv markazi oʻqituvchilar xonasi, maʼruzalar zali, mingdan ziyod kitob fondiga ega kutubxona kabilardan tarkib topgan boʻlsa, IT markazda dasturchilar, menejerlar, server xonalaridan tashqari, muzokaralar oʻtkazish xonalari ham oʻrin olgan.

– Oʻquv markazining asosiy maqsadi bank xodimlarining kasbiy tayyorgarlik darajasini oshirish, strategik va operatsion maqsadlarga erishish uchun zarur boʻlgan xodimlarni doimiy ravishda takomillashtirish mexanizmlarini joriy etishdan iborat, – deydi “Oʻzsanoatqurilishbank”ATB Oʻquv markazi rahbari Ozoda Saidkarimova. – Bundan tashqari, bank xodimlarini ichki va tashqi tayyorlash tizimi rivojlantiriladi, masofaviy taʼlim tizimi kengaytiriladi, xodimlarni baholash tizimi ishlab chiqiladi. Mahalliy va xorijiy oliy oʻquv yurtlari hamda qator xalqaro tashkilotlar bilan hamkorlikda turli oʻquv dasturlari boʻyicha ilmiy-amaliy seminar va treninglar tashkil etiladi.

Bundan tashqari, xodimlarni bir jamoa boʻlib ishlashga, jamoadagi psixologik muhitni yanada yaxshilashga hamda ularning ishga va yangi lavozimlarga moslashuvini tezlashtirishga xizmat qiluvchi dasturlar ishlab chiqiladi. Ularda “soft skills” va “hard skills” koʻnikmalari yanada rivojlantiriladi.

– Tuzilmamiz xodimlari faoliyati asosan dasturlash, ilovalar yaratish, bank biznes jarayonlarini raqamlashtirish va mijozlar uchun yangi raqamli xizmatlarni yaratishga qaratilganligi bois ular uchun har tomonlama qulay ijodiy muhit yaratish muhim hisoblanadi, – deydi “Oʻzsanoatqurilishbank” ATB Axborot texnologiyalari departamenti direktori Abror Kenjayev. – Endilikda IT markazda dasturchilar guruhidan iborat mutaxassislarimiz zamonaviy va ish sharoiti oʻziga xos dizaynga ega muhitda faoliyat yuritadi. Bu, oʻz navbatida, bugungi kunda Bank biznes modelini avtomatlashtirish jarayonida zimmamizdagi vazifalarni oʻz vaqtida va samarali bajarishimizda muhim rol oʻynaydi.

IT markazda bir nechta “Agile” guruhlari ham faoliyat yuritadi. Ular Bank tizimida joriy qilinayotgan yangi loyihalar va xizmatlarni ishga tushirishda koʻmaklashish barobarida, oʻzlari ham muassasaning strategik vazifalaridan kelib chiqib dasturiy mahsulotlar yaratadi.

Xususan, bugungi kunda guruh aʼzolari CRM dasturini ishlab chiqish, kredit konveyerini amaliyotga tatbiq etish, risk modelini qayta tayyorlash kabi loyihalar ustida ish olib bormoqda.

Вернуться назад

1230

Другие новости