O‘zsanoatqurilishbank Germaniyaning yetakchi banklari bilan hamkorlikni kengaytirmoqda

Joriy yilning 19–20 iyun kunlari Germaniyaning Dyusseldorf shahrida O‘zbekiston – Germaniya ishbilarmonlar kengashining 9-majlisi bo‘lib o‘tdi.
An’anaviy tarzda tashkil etilayotgan mazkur tadbir ikki davlat ishbilarmon doiralari, yetakchi kompaniyalari va moliya muassasalari o‘rtasidagi hamkorlikni yanada rivojlantirishga qaratilgan.

Joriy yilgi uchrashuvda ham qator istiqbolli kelishuvlarga erishildi. Xususan, “O‘zsanoatqurilishbank” Germaniyaning yetakchi moliyaviy muassasalari — “DZ Bank” va “AKA Bank” bilan umumiy qiymati 100 million yevroga teng shartnomalarni imzoladi.

Mazkur kelishuvlar doirasida O‘zbekistondagi tadbirkorlik subyektlari, ayniqsa mikro, kichik va o‘rta biznes vakillarining tashqi savdo operatsiyalarini moliyalashtirish rejalashtirilgan. Shuningdek, banklar o‘rtasidagi g‘aznachilik amaliyotlari, kadrlar salohiyatini oshirish va boshqa yo‘nalishlardagi qo‘shma loyihalarni amalga oshirish yuzasidan ham kelishuvga erishildi.

Ma’lumot uchun:
DZ Bank — Germaniyaning eng yirik banklaridan biri bo‘lib, korporativ va chakana moliya xizmatlari, kapital bozorlari hamda g‘aznachilik sohalarida faoliyat yuritadi. Bankning jami aktivlari 659,6 milliard yevroni, kapitali esa 32,6 milliard yevroni tashkil etadi.

AKA Bank — Germaniyaning yirik moliya institutlari, jumladan “Deutsche Bank”, “Commerzbank”, “BayernLB”, “LBBW” tomonidan tashkil etilgan tijorat banki bo‘lib, eksport va savdoni moliyalashtirish yo‘nalishida faoliyat yuritadi.

Qayd etish joiz, ushbu hamkorlik O‘zbekiston bank sektorida xalqaro hamkorlikni yanada mustahkamlash, investitsiyaviy jozibadorlikni oshirish va tadbirkorlik muhitini qo‘llab-quvvatlashga xizmat qiladi.

Orqaga qaytish

760

Boshqa yangiliklar