Davlat dasturlari ijrosi

Bank va biznes vakillari muloqoti

Oʻzsanoatqurilishbank tomonidan hududlarda zargarlik buyumlarini ishlab chiqarish hamda muqobil energiya manbalaridan foydalanishda tadbirkorlarga yaratilgan imkoniyatlar targʻibotiga qaratilgan uchrashuvlar davom etmoqda. Navbatdagi ana shunday tadbir Xorazm viloyatida tashkil etildi.

Soʻnggi yillarda zargarlik sanʼati anʼanalarini qayta tiklash, mahalliy zargarlik buyumlarini ishlab chiqarishni rivojlantirish, ularning ichki va tashqi bozorda raqobatbardoshligini taʼminlash, shuningdek, aholining sifatli zargarlik mahsulotlariga boʻlgan ehtiyojini qondirishga qaratilgan qator chora-tadbirlar amalga oshirilmoqda.

Shu bilan birga, mamlakatimizda zargarlik buyumlarini ishlab chiqarish, xom ashyo xaridi, ishlab chiqarilgan mahsulot savdosining katta qismi yashirin tarzda amalga oshirilmoqda va tashkil etilgan yangi ishlab chiqarish quvvatlari toʻlaqonli faoliyat koʻrsatmayapti.

Shu bois davlatimiz rahbari tomonidan 2022-yil 23-dekabrdagi “Zargarlik buyumlarini ishlab chiqarish quvvatlarini kengaytirish va mahalliy zargarlarni har tomonlama qoʻllab-quvvatlash boʻyicha qoʻshimcha chora-tadbirlar toʻgʻrisida”gi qaror qabul qilinib, unda zargarlik sohasini mahalliy sanoatning asosiy drayverlaridan biriga aylantirishga qaratilgan vazifalar belgilandi.

– Uchrashuvda zargarlik buyumlarini ishlab chiqaruvchilarga ularning qimmatbaho metallarga boʻlgan talabini qondirish uchun qonunchilikda nazarda tutilgan imkoniyatlar tushuntirildi, – deydi “Oʻzsanoatqurilishbank” ATBning Xorazm hududiy boshqarmasi boshligʻi Azamat Kushchanov. – Xususan, kechiktirib toʻlash sharti bilan sotilgan qimmatbaho metallar uchun toʻlov majburiyatlari barcha banklarning kafolatlari, shuningdek, Investitsiyalar, sanoat va savdo vazirligi huzuridagi Eksportni ragʻbatlantirish agentligining kafilligi bilan taʼminlanishi, toʻlov majburiyatlarini taʼminlash maqsadida beriladigan bank kafolati zargarlik buyumlarini ishlab chiqaruvchi yakka tartibdagi tadbirkorlarga ham berilishi, toʻlov majburiyatlarini taʼminlash maqsadida beriladigan bank kafolati va kafillik boʻyicha xizmat haqini qatʼiy miqdordagi summada belgilash mumkinligi, hududlarda zargarlar uchun yaratilgan xomashyo, materiallar va butlovchi qismlarning zaxiralari hamda ulardan foydalanish tartibi, zargarlik buyumlarini ishlab chiqaruvchilar tomonidan banklarda kreditlar hamda bank kafolatlarini revolver tarzda olish imkoniyati mavjudligi maʼlum qilindi.

Tadbirda, shuningdek, Prezidentimiz tomonidan shu yil 16-fevralda qabul qilingan “2023-yilda qayta tiklanuvchi energiya manbalarini va energiya tejovchi texnologiyalarni joriy etishni jadallashtirish chora-tadbirlari toʻgʻrisida”gi qarori mazmun-mohiyatiga ham alohida toʻxtalindi.

Muqobil energiya manbayi sifatida quyosh panellaridan foydalanishning ijtimoiy-ekologik hamda iqtisodiy ahamiyati tushuntirildi. Shu maqsadda bank tomonidan tadbirkorlik subyektlariga 5 yilgacha muddatga yillik 21 foizdan kredit mablagʻlari ajratilayotgani aytib oʻtildi.

– Viloyatda yirik paxta-toʻqimachilik klasterimiz mavjud, – deydi tadbirkor Hamidulla Sheraliyev. – Klaster qoshida Urganch shahrida 500 oʻrinli tikuv fabrikamiz faoliyat yuritadi, Yangiariq tumanida esa, ming gektarli yer maydonida xom ashyo yetishtiriladi. Joriy yilda 200 gektar yer maydonida tomchilab sugʻorish tizimini joriy qilayapmiz. “Yashil” texnologiyalarga asoslangan ushbu loyihamiz Oʻzsanoatqurilishbank tomonidan moliyaviy qoʻllab-quvvatlanmoqda.

Biznes va bank vakillarining muloqoti ochiq, samimiy ruhda oʻtdi. Unda tadbirkorlar bank xizmat va mahsulotlarini yanada qulaylashtirish boʻyicha oʻz taklif v mulohazalari bilan boʻlishdi.

Bank Axborot xizmati

Вернуться назад

761

Другие новости