Yangiliklar

“Gazgan Marble Group” Markaziy Osiyoda yagona loyihani ishga tushirdi

Qurilish materiallari ishlab chiqarish “drayver” tarmoqlardan biriga aylandi. Mazkur yoʻnalishda xususiy va xorijiy investitsiyalar, tijorat banklari kreditlari hamda zamonaviy texnologiyalarni jalb qilgan holda «qoʻshimcha qiymat zanjirlari»ni kengaytirish, ishlab chiqarish tannarxi va xarajatlarini kamaytirish, tayyor materiallar ishlab chiqarishni mahalliylashtirish asosida mahsulotlar raqobatbardoshligini oshirishga erishilmoqda. Yana bir muhim jihat, sanoatning ushbu turi bandlik darajasini oshirishda muhim rol oʻynamoqda.

Markaziy Osiyoda yagona kompozit qoplama plitalar ishlab chiqaruvchi “Gazgan Marble Group” masʼuliyati cheklangan jamiyati ana shunday korxonalardan biri. U yerda Gʻazgʻon marmar toshini qayta ishlab, turli oʻlchamdagi kompozit plitalar va arxitektura mahsulotlari ishlab chiqarilmoqda.

“Oʻzsanoatqurilishmateriallari” uyushmasi, Oʻzsanoatqurilishbank va Navoiy viloyati hokimligi hamkorligida tashkil etilgan press-turda jurnalistlar korxona rahbarlari, ishchi-xodimlari bilan muloqot qildi, ishlab chiqarish jarayonini koʻzdan kechirdi.

Taʼkidlanishicha, Navoiy erkin iqtisodiy zonasida joylashgan korxona 2022-yil iyul oyida foydalanishga topshirilgan. Investitsiya loyihasining qiymati 30,6 mln dollarni tashkil etadi. Unga Oʻzsanoatqurilishbank tomonidan 13,3 mln. yevro miqdorida xorijiy kredit liniya jalb qilinib, mablagʻlar Italiyadan ilgʻor energiya tejamkor texnologiyalar keltirishda foydalanildi.

Mega zavodda Gʻazgʻon marmar toshini qayta ishlash natijasida oʻnga yaqin turdagi yiliga 300 ming kv. metr kompozit qoplamali plitalar va 500 tonna meʼmoriy mahsulotlar tayyorlanadi. Yaratilgan ish oʻrni 200 dan ortiq.

Eʼtiborlisi, korxona “breton” xalqaro guruhi tomonidan qabul qilingan zamonaviy standartlarga muvofiq barpo etilgan. Bu ishlab chiqarishning barcha bosqichlarida ekologik xavfsizlik qoidalariga toʻla amal qilinganini anglatadi. Kompozit qoplamali plitalar ishlab chiqarish jarayonida chiqindi chiqarish koʻrsatkichi nolga teng.

Bugungi kunda “Gazgan Marble Group” mahsulotlari Qozogʻiston Respublikasiga eksport qilinmoqda. Shuningdek, korxonaning eksport salohiyatini yanada oshirish maqsadida Qirgʻiziston va Tojikistondagi hamkorlar bilan ham muzokaralar olib borilmoqda.

Bank Axborot xizmati

Вернуться назад

280

Другие новости