Yangiliklar

O‘zsanoatqurilishbank aloqa markazi tomonidan mahsulotlar sotuv hajmi oshmoqda

Joriy yilning 4-iyun kuni Axborot va ommaviy kommunikatsiyalar agentligida O‘zsanoatqurilishbank tizimida telemarketing va telefon orqali sotuv faoliyatiga bag‘ishlangan brifing bo‘lib o‘tdi.

Ma’lumki, bugungi raqamli transformatsiya va ilg‘or texnologiyalar asri barcha jabhalar qatori bank xizmatlarini ko‘rsatishning yangi usullarini joriy etish, vaqt va xarajatlarni kamaytirish talabini qo‘ymoqda.

2020-yilda Prezidentimiz tomonidan tasdiqlangan 2020-2025-yillarga mo‘ljallangan O‘zbekiston Respublikasining bank tizimini isloh qilish hamda “Raqamli O‘zbekiston – 2030” strategiyalarida esa, ularni bosqichma-bosqich amalga oshirish mexanizmlari belgilab berilgan.

O‘zsanoatqurilishbank aloqa markazining sotuv nuqtasiga aylantirilgani, avvalo, tizimdagi transformatsiya mahsuli, qolaversa, davr talabidan kelib chiqqan holda amalga oshirilgan loyihalardan biridir.

Mazkur markaz boshlang‘ich davrda mijozlar savollariga javob berish hamda bank mahsulot va xizmatlari haqida ma’lumot taqdim etib kelgan.

Bugungi kunda esa, markaz xodimlari aholiga kredit karta, mikroqarz, depozit, plastik kartalar kabi keng turdagi bank mahsulot va xizmatlarini sotish bilan ham shug‘ullanmoqda.

Brifingda ta’kidlangaidek, telemarketingga asoslangan ushbu yondashuv bankning mobil ofisi sifatida xizmat ko‘rsatmoqda. Bunda mijozlar uy va/yoki xizmat ofisidan chiqmagan holda bank mahsulotlarini sotib olishga muvaffaq bo‘lmoqda.

Tizim telefon qo‘ng‘iroqlaridan foydalanib, mavjud va potensial mijozlar bilan muloqot qilish, bank mahsulot yoki xizmatlarini sotish, shuningdek, turli marketing aksiyalari targ‘iboti va qo‘shimcha ma’lumotlarni taklif qilishni o‘z ichiga oladi. Bunda xodimlar uchun muloqot standartlari ishlab chiqildi. Ularga sotuv asoslari bo‘yicha ko‘nikmalar ham berildi.

– O‘tgan yili Aloqa markazi tomonidan 90 mingdan ziyod qo‘ng‘iroqlar qayta ishlandi, – deydi “O‘zsanoatqurilishbank” Axborot xizmati rahbari Behzod Bozorov. – Ushbu qo‘ng‘iroq egalarining 10 foizi bank mahsulotlarini xarid qildi. Joriy yilning birinchi choragi mobaynida ham markazning sotuv faoliyati sezilarli darajada oshib, mijozlarga xizmat ko‘rsatish standartlariga rioya qilinganlik ko‘rsatkichi (CSAT indeksi) 95 foizga yetkazildi. Ushbu davrda aholi tomonidan bankning onlayn turdagi kreditlariga katta qiziqish bildirildi.

Qayd etish joizki, markaz faoliyatidagi ushbu ijobiy o‘sishlar tizim imkoniyatlarini kengaytirish hisobiga yuzaga kelmoqda.

Xususan, Mijozlar bilan o‘zaro munosabatlarni boshqarish (Customer Relationship Management – CRM) tizimining joriy etilishi ularga tegishli ma’lumotlarni samarali boshqarish va ko‘plab jarayonlarni avtomatlashtirish imkonini yaratdi. Masalan, skriptlar va avtoqo‘ng‘iroqdan foydalanish natijasida qo‘ng‘iroqlarni yakunlash vaqti keskin qisqardi.

Bundan tashqari, mijozning biometriya ma’lumotlari orqali shaxsini autentifikatsiya qilish faol operatsiyalarni masofadan amalga oshirish imkonini bermoqda. Ya’ni, mijoz kartasi bloklansa yoki pasport ma’lumotlari eskirgan taqdirda uning bank xizmatlari markaziga borishi shart emas. Barchasini Aloqa markaziga qo‘ng‘iroq qilib, operatorlar ko‘magida 24/7 rejimida amalga oshirish mumkin.

Ayni paytda markaz faoliyatida sun’iy intellektni qo‘llash bo‘yicha ham o‘rganishlar olib borilmoqda. Bu borada chat-botlar va ovozli yordamchilardan foydalanish sinov bosqichidan o‘tmoqda.

Brifingda bank tizimida aholiga xizmat ko‘rsatishni yanada yaxshilash, sotuv jarayonlarini optimallashtirish hamda mijozlar ehtiyojlariga mos yechimlarni taklif qilish yo‘lidagi o‘rganishlar davom etayotganligi aytib o‘tildi.

Bank Axborot xizmati

Вернуться назад

378

Другие новости