Yangiliklar

SQB oʻquvchilarning moliyaviy savodxonligini oshirmoqda!

Maktab oʻquvchilariga savol bilan yuzlandik. Xoʻsh, kim pul yigʻishni yaxshi koʻradi, yoki kim kundalik harajatlarini nazorat qilib boradi? Zal suv quygandek jim-jit edi! Keyin ularga navbatdagi savolni berdik. Aytingchi, kim har kuni pul ishlatadi? Negadir 1-savolga koʻtarilmagan qoʻllar bu javobga kelganda jonlanib qoldi. Birdaniga hamma: "men, men, men, men....."

Shu onda oʻylanib qoldik. Nega farzandlarimiz har kuni bizdan maktabga pul olishni qoyillatishadi-yu, lekin uni mustaqil tasarruf eta olishmaydi. Yoki nega 10 yoshlik bolalar, doʻkonga kattalar yordamisiz chiqib, qaytimni toʻgʻri olishni uddalay olmaydi. Balki ularga moliyaviy savodxonlik yetishmas?! Xoʻsh, uni kimdan, qachon oʻrganishadi? 

Oʻzsanoatqurilishbank tizimida Oʻzbekiston Respublikasi Markaziy banki bilan hamkorlikda “Butunjahon jamgʻarish kuni” (“World savings day”) xalqaro taʼlim kampaniyasi doirasida umumtaʼlim maktablarida oʻtkazilayotgan moliyaviy savodxonlik darslari oʻquvchi-yoshlarga ana shu kabi bir qarashda arzimasdek, lekin hayotda nihoyatda zarur boʻlgan bilimlarni yetkazishga qaratilgan.

Bugungi kunga qadar aholining moliyaviy savodxonligini oshirish va yoshlarda oʻz pul mablagʻlari jamgʻarish koʻnikmalarini shakllantirish maqsadida tashkil etilgan ushbu taʼlim dasturi bugungi kungacha 60dan ziyod umumtaʼlim maktablaridagi 3 mingdan ortiq oʻquvchilarni qamrab oldi.

– Moliyaviy taʼlim kelajakda yoshlarga moliyaviy masalalarda oson va toʻgʻri qaror qabul qilishda koʻmaklashadi, ularning pul mablagʻlari bilan munosabatda xavfsizligini oshiradi, – deydi “Oʻzsanoatqurilishbank” ATBning poytaxtimizdagi Rakat filiali boshqaruvchisi oʻrinbosari A.Shavkatov. –Aksincha, moliyaviy bilimga ega boʻlmaslik esa, nafaqat moliyaviy inqirozga, balki tez-tez firibgarlar tuzogʻiga tushishga, haddan tashqari koʻp qarz va ijtimoiy-ruhiy muammolarga kirib borishga sabab boʻladi. Shu nuqtayi nazardan xalqaro taʼlim kampaniyasi doirasidagi ushbu tashabbuslar har jihatdan dolzarb, uni qoʻllab-quvvatlashda davom etamiz.

Mashgʻulotlarda Bank mutaxassislari oʻz malaka va tajribalariga tayanib oʻquvchi-yoshlarni bank-moliya olami bilan tanishtirmoqda, bank xizmatlari isteʼmolchilari sifatida huquqiy bilimlarini oshirib, ularning mustaqil hayotida asqotuvchi moliyaviy xulq-atvorini shakllantirmoqda.

Xususan, oʻquvchilar “byudjet”, “moliya”, “bank” tushunchalari bilan birga, omonat, plastik karta, kredit kabi eng ommalashgan xizmatlar, shuningdek, onlayn xizmatlar toʻgʻrisida batafsil maʼlumotga ega boʻlishmoqda. Mobil ilova misolida raqamli bank imkoniyatlari bilan tanishtirilmoqda.

– Oʻzimda ishbilarmonlik qobiliyati borligini his qilaman, – deydi yuqori sinf oʻquvchilaridan biri Sanjar Ravshanov. – Bank xodimlari bilan uchrashuv mustaqil ish boshlashimda mablagʻ borasidagi oʻylarimni aritdi. Kreditni qarz, ishni esa qarzdan boshlamaslik kerak deb tushunardim. Bank mutaxassislari diqqatni qarz uzishga emas, balki, undan qanday unumli foydalanishga qaratish lozimligini oʻrgatdi. 

– Moliyaviy savodxonlik koʻnikmalari yoshlarga real maqsadlar qoʻyish va ularga erishish sari ishonch bilan borish imkonini beradi, – deydi “Oʻzsanoatqurilishbank” ATBning Yashnobod filiali boshqaruvchi oʻrinbosari A.Luqmonov. – Ishlab topganingizni koʻpaytirish tugul, shunchaki ushlab turish uchun ham kishining uquvi boʻlishi kerak. Oʻzaro savol-javoblarda oʻquvchilar mana shunday bir qarashda oddiy, lekin dolzarb savollarga javob olishdi.

Bugungi kungacha Bank tomonidan uch mingdan ziyod oʻquvchi-yoshlarning moliyaviy savodxonligi oshirildi. Biroq, bu raqam oʻsishda davom etmoqda. “Butunjahon jamgʻarish kuni” xalqaro taʼlim kampaniyasi ishtirokchilari boʻlmish Oʻzsanoatqurilishbank xodimlari viloyatlardagi chekka qishloqlarga ham kirib bormoqda.

Bank Axborot xizmati

Вернуться назад

1112

Другие новости