Yangiliklar

Faxriylar hamisha e'zozda

09.05.2020 19:15

9 may – Xotira va qadrlash kuni munosabati bilan Oʻzsanoatqurilishbank tizimida faoliyat yuritgan bir guruh mehnat faxriylari holidan xabar olinib, bayram sovgʻalari ulashildi.

Xotira – ajdodlar jasorati va oʻgiti bilan bogʻliq tengsiz maʼnaviy merosni anglatsa, qadr – kishi turmush-tarzi va faoliyatini munosib baholab, ruhini yuksaltiruvchi olijanob amaldir.

Yurtimizda Xotira va qadrlash kuni har yili eng aziz bayramlarimizdan biri, sharqona urf-odatlarimiz timsoli sifatida keng nishonlanib, Ulugʻ Vatan urushi qatnashchilari, front ortida jasorat koʻrsatgan piru badavlat keksalar hamda mehnat faxriylariga alohida ehtirom koʻrsatiladi.

Jumladan, Oʻzsanoatqurilishbank tizimida ham uzoq yillar faoliyat yuritib, ayni paytda keksalik gashtini surayotgan nafaqadagi bankchilarni yoʻqlash anʼanaga aylangan.

Kuni kecha bank rahbariyati boshchiligida bir guruh yosh xodimlar ana shunday mehnat faxriylari xonadoniga tashrif buyurgan holda, ular koʻngliga ham bayram shukuhini kiritib, ham duolarini olishga muvaffaq boʻldilar.

– Katta avlod vakillari bilan uchrashuv biz yoshlar uchun doim ibrat maktabi boʻlgan, – deydi Kichik biznesni kreditlash departamenti boshqarma boshligʻi Jasur Boltayev. – Bugun ham faxriylarimiz holidan xabar olganimizda ulardagi vatanparvarlik va shukronalik hissi qalbimizga koʻchib, ruhan sokinlikka erishdik. Ishda halollik va fidoyilikni kasb etgan doim qadr topishini tushunib yetdik.