Yangiliklar

OAV vakillari “Namangan sement”ga tashrif buyurishdi

25.09.2023 16:50

Oʻzsanoatqurilishbank, “Oʻzsanoatqurilishmateriallari” uyushmasi hamda Energetika vazirligi hamkorligida “Namangan sement” masʼuliyati cheklangan jamiyatiga press-tur tashkil etildi. Unda jurnalistlar muqobil energiya manbalari hisobiga faoliyat yuritayotgan korxona faoliyati bilan yaqindan tanishdi.

Namangan viloyatining Chust tumanida joylashgan “Namangan sement” sement ishlab chiqarish boʻyicha vodiydagi eng yirik korxonalardan biri hisoblanadi. Bu yerda yiliga 1,1 mln tonna sifatli sement mahsuloti ishlab chiqariladi. 

Korxona Xitoyning zamonaviy, energiya tejamkor texnologiyalari bilan jihozlangan. Ishlab chiqarish toʻliq avtomatlashtirilgan boʻlib, mahsulot tayyorlash uchun xorijiy va mahalliy yetuk mutaxassislar jalb etilgan. 

2022-yilda jamiyat investitsiya dasturi doirasida qoʻshimcha ishlab chiqarish quvvatini oshirdi. Bu yerda qariyb 1000 nafar namanganlik yoshlar ish bilan taʼminlangan. Eʼtiborlisi, korxonada tayyorlangan mahsluotlarga nafaqat mahalliy bozorda, balki qoʻshni davlatlardan ham talab yuqori.

Press-tur davomida ommaviy axborot vositalar vakillari koʻmirda tashkil etilgan ishlab chiqarish jarayoni bilan yaqindan tanishdi. Ushbu muqobil energiya manbasi afzalliklari, iqtisodiy ahamiyati haqida maʼlumotga ega boʻldi.

– Zavod yiliga 245 milliard soʻmlik tabiiy gazni tejagani holda, bir yilda qoʻshimcha 125 milliard soʻmni iqtisod ham qiladi, – deydi “Namangan sement” MCHJ rahbari Rashid Murodov. – Qolaversa, kelgusida bu yerda mavjud issiqlikni maxsus uskunalarga yoʻnaltirish orqali elektr energiyasiga nisbatan talabining 40 foizini taʼminlash ham koʻzda tutilmoqda. Bu esa qoʻshimcha qariyb 25 milliard soʻmni tejash imkonini beradi. 


Bank Axborot xizmati

Другие новости