O‘zsanoatqurilishbankda yangi qonun mazmun-mohiyatiga bag‘ishlangan tadbir tashkil etildi

Joriy yilning 14-iyun kuni O‘zsanoatqurilishbank tomonidan O‘zbekiston Respublikasining “Manfaatlar to‘qnashuvi to‘g‘risida”gi Qonuni mazmun-mohiyatiga bag‘ishlangan tadbir tashkil etildi. Tadbirda O‘zbekiston Respublikasi Korrupsiyaga qarshi kurashish agentligi, “Cert International” sertifikatlash tashkiloti hamda ommaviy axborot vositalari vakillari qatnashdi.

Ma’lumki, shu yilning 5-iyun kuni Prezidentimiz tomonidan O‘zbekiston Respublikasining “Manfaatlar to‘qnashuvi to‘g‘risida”gi Qonuni imzolandi. Qonun rasmiy e’lon qilingan kundan e’tiboran 6 oy o‘tgach kuchga kiradi.

Tadbirda mazkur qonun davlat organlari va davlat ulushi 50 foizdan ortiq kompaniyalarga nisbatan tadbiq etilishi ta’kidlandi. Manfaatlar to‘qnashuvi kimlar o‘rtasida va qachon vujudga kelishi mumkinligi haqida tushuncha berildi.

Manfaatlar to‘qnashuvi – shaxsning shaxsiy (bevosita yoki bilvosita) manfaatdorligi uning o‘z lavozim yoki xizmat majburiyatlarini lozim darajada bajarishiga ta’sir ko‘rsatayotgan yohud ta’sir ko‘rsatishi mumkin bo‘lgan hamda shaxsiy manfaatdorlik bilan fuqarolar, tashkilotlar, jamiyat yoki davlatning huquqlari, qonuniy manfaatlari o‘rtasida qarama-qarshilik yuzaga kelayotgan (mavjud manfaatlar to‘qnashuvi) yoki yuzaga kelishi mumkin bo‘lgan (ehtimoliy manfaatlar to‘qnashuvi) vaziyatdir.

– Mazkur qonunning qabul qilinishi davlatimiz rahbari boshchiligida amalga oshirilayotgan korrupsiyaga qarshi tizimli islohotlarning yana bir amaliy ifodasidir, – deydi “O‘zsanoatqurilishbank” ATB boshqaruv raisi o‘rinbosari Farrux Abdurahmonov. – Bankimiz tomonidan ham korrupsiyaga murosasizlikni ta’minlash, ijtimoiy-iqtisodiy sabablarini bartaraf qilish hamda bu illatning oldini olishga qaratilgan chora-tadbirlar amalga oshirib kelinmoqda.

Natijada 2022 yilda bankning Korrupsiyaga qarshi kurashish tizimi Xalqaro ISO 37001:2016 standart talablariga muvofiqlashtirilib, “Cert International” sertifikatlash tashkiloti tomonidan sertifikat taqdim etildi.

Bank tizimida manfaatlar to‘qnashuvining oldini olish va boshqarish ishlari joriy etildi.

Odob-axloq komissiyasi faoliyati yo‘lga qo‘yildi.

Tadbirda ishtirokchilar mazkur qonunning mazmun-mohiyati to‘g‘risida o‘z fikr-mulohazalari bilan o‘rtoqlashdi.

Bank Axborot xizmati

Go back

1477