“O‘zsanoatqurilishbank” ATB Undiruv markazi Hududlarda yuridik va jismoniy shaxslarning qarzdorliklarini undirish guruhiga menejer va kichik menejer lavozimlari uchun malakali, mas’uliyatli va tashabbuskor nomzodlarni ishga taklif etadi.

Ish joyi

Toshkent shahri.

Ish tajribasiga qo‘yiladigan talablar

• Kichik menejer: kamida 1 yil ish tajribasi.
• Menejer: kamida 2 yil ish tajribasi.

Asosiy vazifalar

• Muddati o‘tgan va muammoli kredit qarzdorliklarini undirish bo‘yicha standart hamda individual strategiyalarni ishlab chiqish va amalga oshirishda ishtirok etish.
• Yuridik shaxslarning muddati o‘tgan kredit qarzdorliklarini undirish bo‘yicha o‘z vaqtida va samarali choralar ko‘rish.
• Qarzdorlar, kafillar, birgalikda qarz oluvchilar va garov mulki egalari bilan muzokaralar olib borish hamda qarzdorliklarni so‘ndirish choralarini tashkil etish.
• Qarzdorlarni kredit majburiyatlari, to‘lov muddatlari va yuzaga kelishi mumkin bo‘lgan oqibatlar haqida o‘z vaqtida xabardor qilish.
• Talabnoma, ogohlantirish xatlari va boshqa zarur hujjatlarni tayyorlash hamda yuborish.
• Muammoli aktivga aylanish xavfi mavjud kreditlar bo‘yicha erta ogohlantirish signallarini shakllantirish va tegishli tarkibiy bo‘linmalarga taqdim etish.
• Muddati o‘tgan qarzdorliklar ro‘yxatini shakllantirish, ularning holatini tahlil qilish va doimiy monitoringini olib borish.
• Undiruv markaziga o‘tkazilgan, shu jumladan balansdan tashqari hisobga olingan kreditlar bo‘yicha undirish choralarini ko‘rish va ishlar holatini nazorat qilish.
• Sud, notariat, Majburiy ijro byurosi (MIB), sug‘urta tashkilotlari va boshqa tegishli tashkilotlar bilan hamkorlik qilish.
• Muammoli kreditlar bo‘yicha sud jarayonlari, ijro hujjatlari va huquqni muhofaza qiluvchi organlar bilan bog‘liq ishlarni o‘rganish hamda zarur hujjatlarni tayyorlash.
• Qarzdorliklarni so‘ndirishga qaratilgan bank operatsiyalarini belgilangan tartibda amalga oshirish.
• Bankning tegishli tarkibiy bo‘linmalari bilan hamkorlik qilish, xizmat vakolatiga kiruvchi murojaatlarni ko‘rib chiqish va sifatli javoblar tayyorlash.
• Qonunchilik talablariga rioya qilgan holda telefon va boshqa aloqa vositalari orqali muzokaralar olib borish, shuningdek, zaruratga ko‘ra mijozlar manziliga chiqib uchrashuvlar o‘tkazish.

Nomzodga qo‘yiladigan talablar

• Iqtisodiy yoki yuridik yo‘nalish bo‘yicha oliy ma’lumot.
• Tegishli lavozim uchun belgilangan ish tajribasiga ega bo‘lish.
• Kreditlash asoslari, bank mahsulotlari va kredit shartnomalari shartlarini bilish.
• Muddati o‘tgan va muammoli qarzdorliklar bilan ishlash ko‘nikmasi.
• Muzokaralar olib borish, ishchan muloqot o‘rnatish va nizoli vaziyatlarni konstruktiv hal etish qobiliyati.
• Analitik fikrlash, diqqatlilik, mas’uliyatlilik va natijaga yo‘naltirilganlik.
• Stressga chidamlilik, qat’iyatlilik va tashabbuskorlik.
• Rasmiy hujjatlar va xizmat yozishmalarini tayyorlash ko‘nikmasi.
• Bank axborot tizimlari bilan ishlash malakasi.
• Xizmat zarurati bo‘yicha hududlarga xizmat safarlariga chiqishga tayyorlik.

Afzallik beriladi

• Muammoli kreditlar va qarzdorliklarni undirish sohasida tajribaga ega nomzodlarga.
• Sud, MIB, notariat va boshqa tashkilotlar bilan ishlash tajribasiga ega nomzodlarga.
• Bank qonunchiligi va ichki me’yoriy hujjatlar bilan ishlash ko‘nikmasiga ega nomzodlarga.

Ish sharoitlari

• “O‘zsanoatqurilishbank” ATBda rasmiy ishga qabul qilish.
• Ish joyi — Toshkent shahri.
• Bankning ichki tartib-qoidalari va belgilangan mehnat sharoitlari asosida faoliyat yuritish.

Agar Siz mas’uliyatli, tashabbuskor va natijaga intiluvchan bo‘lsangiz, jamoamizga qo‘shiling!

Go back

263

Other news