«SURXONSEMENTINVEST»da ishlab chiqarish jarayoni innovatsion tashkil etilgan

“Oʻzsanoatqurilishmateriallari” uyushmasi va Oʻzsanoatqurilishbank tomonidan Surxondaryo viloyati Jarqoʻgʻon tumanidagi «SURXONSEMENTINVEST» korxonasiga press-tur tashkil etildi.

Press-tur avvalida mutasaddilar ommaviy axborot vositalari vakillari uchun korxona faoliyatiga oid taqdimot oʻtkazdi. Unda zavod quvvati, ishlab chiqarish jarayoni hamda mahsulotlar turi va sifati haqida batafsil maʼlumot berildi.

Taʼkidlanishicha, korxona 2019-yil davlatimiz rahbarining Surxondaryo viloyatiga tashrifi doirasida foydalanishga topshirilgan.

Loyihaning umumiy qiymati 60 mln. dollarni tashkil etadi. Yillik ishlab chiqarish quvvati 360 ming tonnaga teng. Korxonaga Rossiya, Avstriya, Germaniya va Xitoydan keltirilgan energiya tejamkor texnologiyalar oʻrnatilgan. Hozirda u yerda M-450, M-500 markadagi sement turlari ishlab chiqariladi, 400dan ziyod surxondaryolik yigit-qizlar ish bilan band.

Eʼtiborlisi, korxonada ishlab chiqarish faoliyati toʻliq koʻmirda amalga oshiriladi. Bunda foydalaniladigan koʻmirning 6 foizi mahalliy, qolgan 94 foizi qoʻshni davlatlar hisobiga toʻgʻri keladi.

Yana bir maʼlumot, zavodda ishlab chiqarish jarayonining ekologiyaga taʼsirini kamaytirish maqsadida zamonaviy filtrlar oʻrnatilgan.

Korxona mahsulotlari nafaqat bino va inshootlar qurishda, balki neft-gaz, suv xoʻjaligi sohalarida ham keng foydalanilmoqda.

Press-tur davomida jurnalistlar sement xom ashyosi, koʻmirda ishlovchi uskunalar haqida toʻliq maʼlumotga ega boʻlishdi, ishlab chiqarish va qadoqlash jarayonlari, ishchi-xizmatlarchilarga yaratilgan sharoitlar bilan yaqindan tanishdi.

Korxona laboratoriyasida mutaxassislar sinov jarayonlarini amaliy namoyish etishdi.

Bank Axborot xizmati

Go back

1250