Davlat dasturlari ijrosi

Qurilish materiallari sanoati: mas’ullik, harakat va natija


22.01.2024

Qurilish materiallari sanoati: mas’ullik, harakat va natija

Qurilish materiallari sanoati: mas’ullik, harakat va natija

O‘zsanoatqurilishbank tomonidan 2023-yilda qurilish materiallari ishlab chiqarishni moliyaviy qo‘llab-quvvatlashda keng ko‘lamli ishlar amalga oshirildi. Xususan, sohada qiymati 2 mlrd. dollarlik 909 ta loyiha ishga tushirilib, natijada 18 700 ta ish o‘rni yaratildi.

Prezidentimizning 2021-yil 9-iyundagi “Hududlarning sanoat salohiyatini oshirishga doir qo‘shimcha chora-tadbirlar to‘g‘risida”gi farmoniga muvofiq, “O‘zsanoatqurilishbank” ATB Boshqaruv raisi bir paytning o‘zida Qurilish materiallari sanoatini rivojlantirish bo‘yicha kengash raisi, Bank esa, mazkur yo‘nalishdagi ishlarni muvofiqlashtiruvchi sifatida belgilangan edi.

Shunga binoan O‘zsanoatqurilishbank tomonidan o‘tgan davr mobaynida mas’ul idora va tashkilotlar bilan hamkorlikda qurilish materiallari ishlab chiqarish sohasini yangi bosqichga ko‘tarish, tarmoqni rivojlantirish imkoniyatlaridan to‘liq foydalanishga qaratilgan keng ko‘lamli ishlar amalga oshirildi.

Xususan, qurilish materiallari ishlab chiqarishga ixtisoslashtirilgan 24 ta tuman va shaharda yangi loyihalarni ishga tushirishga ko‘maklashuvchi yaxlit tizim yaratildi.

BCG, Deloitte kabi nufuzli xalqaro kompaniyalar ekspertlarini jalb etgan holda, sohani jahon standartlari darajasida rivojlantirish dasturi ishlab chiqildi.

100 ta mahsulot turi bo‘yicha amaliy-uslubiy qo‘llanmalar chop etildi.

Malakali va zarur ko‘nikmalarga ega mutaxassislarni tayyorlash maqsadida yetakchi xorijiy oliy ta’lim muassasalari, jumladan, Turkiyaning Maltepe universiteti hamda Budapesht texnologiyalar va iqtisodiyot universitetlari bilan aloqalar yo‘lga qo‘yildi.

“O‘zqurilishmaterialLITI” MCHJ huzurida ilg‘or xorijiy texnologiyalar asosda ilmiy-tadqiqot va sinov laboratoriyasi tashkil qilindi.

Mazkur amalga oshirilgan ishlar natijasida qurilish materiallari sanoatida yildan-yilga o‘sish qayd etilmoqda.

Jumladan, 2023-yilda qurilish materiallari ishlab chiqarish hajmi 2022-yilga nisbatan 115 foizga o‘sib, 35,3 trln. so‘mga yetdi. Bunda qurilish oynasi (38 mln. kv. m.), gipsokarton (87 mln. kv. m.), keramik plitka (42,6 mln. kv. m.), sement (15,2 mln. tn.) kabi qurilish materiallari eng talabgir mahsulotlar qatoridan o‘rin oldi.

 Qurilish materiallari sanoatida 2023-yilda 2 mlrd. dollarlik investitsiyalar o‘zlashtirildi. Shundan 1,2 mlrd. dollari to‘g‘ridan to‘g‘ri xorijiy investitsiyalar va kreditlar hisoblanadi.

Davlat investitsiya dasturi doirasida ham o‘zlashtirilgan xorijiy investitsiya va kreditlar belgilangan rejadan ortiq, ya’ni o‘tgan yilning shu davriga nisbatan 102 foizga bajarildi.

Sohada qiymati 2 mlrd. dollarlik 909 ta loyiha ishga tushirilishi natijasida 18 700 ta ish o‘rni yaratildi.

Ana shunday loyihalardan biri – Toshkent shahridagi “Oriyent keramik” mas’uliyati cheklangan jamiyatiga tegishli bo‘lib, uni amalga oshirish hisobiga yiliga 9 mln. kv. metr keramik plitka ishlab chiqarish va 200 ta ish o‘rni yaratishga erishildi.

Qiymati 30 mln. dollarga teng yana bir loyiha esa, Farg‘ona viloyatida “BNBM building materials sentral Asia” korxonasi tomonidan tatbiq etildi. Tashabbuskor tomonidan yiliga 44 mln. kub m. gipsokarton va 3 ming tonna metall profillari ishlab chiqarish zavodi barpo etilishi natijasida mahalliy aholining 150 nafari bandligi ta’minlandi.

Davlatimiz rahbari tomonidan joriy yil 2-yanvarda investitsiya siyosatini amalga oshirish va “yashil” energetikani rivojlantirish masalalari muhokamasiga bag‘ishlab o‘tkazilgan yig‘ilishda sanoat tarmoqlariga investitsiyalarni jalb qilishda yirik investorlar bilan manzilli ishlash, iqtisodiy diplomatiyani va chet eldagi diplomatik vakolatxonalar ishtirokini kuchaytirish muhimligi alohida qayd etildi.

O‘zsanoatqurilishbank tomonidan “O‘zsanoatqurilishmateriallari” uyushmasi bilan hamkorlikda qurilish materiallari sanoatida investitsiya, kooperatsiya, eksport va logistika yo‘nalishlarida xorijiy aloqalarni kengaytirish, shuningdek, mahsulotlarni tashqi bozorlarga “O‘zbekistonda ishlab chiqarilgan” degan yorliqda chiqarib, milliy brend tanilishiga ko‘maklashish bo‘yicha izchil ishlar olib borilmoqda.

Boku shahrida “O‘zbekiston savdo uyi” tashkil etildi. Joriy yilda bunday “Savdo uylari”ni Arkadag‘, Astana, Istanbul, Qorabog‘ shaharlari hamda Latviya va Litva davlatlarida ochish rejalashtirilgan.

Qurilish materiallari sanoatida 2023-yil eksport amaliyotlari bo‘yicha ham sermahsullik kasb etdi. Jami 690 mln. dollarlik (shundan, 36 mln. dollar ichki eksport) mahsulotlar buyurtmachilarga yetkazilib, reja ko‘rsatkichi qariyb 107 foizga bajarildi.

Bunda eksportyor korxonalar soni 214 taga ko‘paydi, eksport qilinadigan qurilish materiallari turlari 55 tadan 62 taga oshirildi, eksport geografiyasi 47 ta davlatdan 52 taga yetkazildi.


Bank Axborot xizmati





Другие новости

03.04.2024 16:24:30
Tadbirkorlar bilan manfaatli uchrashuvlar o‘tkazilmoqda

O‘zsanoatqurilishbank rahbariyati tomonidan joylarda tadbirkorlar bilan uchrashuvlar tashkil etilmoqda. Shu kunlarda ana ...

06.03.2024 14:17:11
Qaror ijrosi doirasida

O'zsanoatqurilishbank Axborot xizmati yangi loyihani e'tiboringizga havola etadi. Unda hududlarda amalga oshirilishi rej ...

15.02.2024 18:13:24
O‘zbekiston-Ozarbayjon hamkorligidagi investitsiya loyihalari muhokama qilindi

“O‘zsanoatqurilishmateriallari” uyushmasida Ozarbayjon-O‘zbekiston investitsiya kompaniyasi bosh direktori Nazim G ...


Дата последнего обновления: 22.01.2024 17:13  
up