Yangiliklar

Oʻzsanoatqurilishbank: yil sarhisobi va istiqbolli rejalar

Joriy yilning 16 yanvar kuni “Oʻzsanoatqurilishbank” ATB Boshqaruvining 2020 yil yakunlari va 2021 yilga moʻljallangan ustuvor vazifalari muhokamasiga bagʻishlangan yigʻilishi boʻlib oʻtdi.

Yigʻilishda dastlab Oʻzbekiston Respublikasi Prezidentining 2020 yil 29 dekabrdagi Oliy Majlisga Murojaatnomasida keltirib oʻtilgan vazifalarga toʻxtalinib, unda bank tizimiga doir masalalar chuqur oʻrganildi.

Ayniqsa, “Mahallabay” ishlash tizimi yuzasidan 11-16 yanvar kunlari Oʻzbekiston Respublikasi Markaziy bankida oʻtkazilgan oʻquv-amaliy seminar natijalarini hududiy filiallar oʻrtasida keng targʻib qilish hamda mazkur tizim boʻyicha ishlarni tizimli yoʻlga qoʻyish lozimligi taʼkidlandi.

Yigʻilish davomida Boshqaruv aʼzolari tomonidan Bankning joriy yilga moʻljallangan strategik rejasi muhokama qilinib, Murojaatnomada keltirilgan sohaga oid vazifalarga muvofiqlashtirildi.

Shundan soʻng yigʻilish kun tartibiga koʻra, Bankning 2020 yil yakunlari boʻyicha faoliyati sarhisob qilindi.

Hisobot davrida Bank aktivlari 49 trln. soʻmni, kredit portfeli 39,9 trln. soʻmni, jami depozitlar 11,4 trln. soʻmni hamda umumiy kapitali 6,7 trln. soʻmni tashkil etdi.

2020 yil davomida bank tomonidan jami 978 ta loyiha, shundan hududlarni rivojlantirish dasturlariga asosan 966 ta loyiha moliyalashtirildi.

Shahrisabz tumanidagi “Shahrisabz tekstil” MCHJning yiliga 5,8 ming tonna sintetik tola va mato ishlab chiqarish, Fargʻona shahridagi “Uz-segang” qoʻshma korxonasining yillik quvvati 5,8 ming tonna qishloq xoʻjaligi mahsulotlarini yetishtirish, Sardoba tumanidagi “Sardoba oqsaroy tekstil” MCHJning yiliga tayyor holdagi 1,4 mln. dona mahsulot va 900 ming tonna mato ishlab chiqarish quvvatiga ega loyihalari shular jumlasidandir.

Yigʻilishda Bank tomonidan koronavirus pandemiyasi oqibatlarini yumshatish borasida koʻrilgan chora-tadbirlarning ham hisoboti tinglandi.

Unga muvofiq, pandemiya sababli qiyin ahvolga tushib qolgan 1235 nafar tadbirkorni qoʻllab-quvvatlash uchun 4 trln. soʻm, 91 ta eksportyorga 2,6 trln. soʻm kredit ajratilgani, 3 809 ta mijozning 2,9 trln. soʻmlik kreditlari muddati 6 oyga uzaytirilgani aytib oʻtildi.

132 ta eksportyorlarga aylanma mablagʻlarni toʻldirish uchun 3,6 trln. soʻm moliyalashtirildi.

Xalqaro moliya korporatsiyasi koʻmagida Oʻzbekistonda birinchi boʻlib yashil loyihalarni moliyalashtirish mexanizmi yoʻlga qoʻyildi, 31,9 mln. dollarlik 17 ta ana shunday loyiha moliyalashtirildi.

“SQB consult” kompaniyasi bilan hamkorlikda barcha hududlarda moliyaviy savodxonlikni oshirish maqsadida oʻquv kurslari tashkil etildi. Bugungi kunda kompaniya tadbirkorlarga biznes reja ishlab chiqish, mol-mulkni baholash, import shartnomasini ekspertiza qilishda yordam koʻrsatmoqda.

Bundan tashqari, Xalqaro moliya korporatsiyasi hamda Yevropa tiklanish va taraqqiyot banki ekspertlari koʻmagidagi Bankni transformatsiya qilishning 2-bosqich ishlari yakuniga koʻra, Xalqaro standartlar asosida korporativ boshqaruv va risk menejment tizimi takomillashtirildi, Kengash tarkibiga bank-moliya sohasida xalqaro tajribaga ega 4 nafar mustaqil aʼzo kiritildi , Korporativ boshqaruv xizmati joriy qilinib, Kengash tarkibida 5 ta yangi qoʻmita tashkil etildi.

Mijozlarga yoʻnaltirilgan Bankning yangi tashkiliy tuzilmasi joriy qilinib, xalqaro tajribalar asosida tashkiliy tuzilma 5 ta blokka ajratildi.

Har bir biznes yoʻnalishlarida mijozbay xizmat koʻrsatuvchi universal xodimlar tayyorlandi (RM).

Mijozlarni tezkor kreditlash maqsadida tadbirkorlar uchun 26 turdagi, yirik korxonalarga 8 turdagi va aholi uchun 22 turdagi modulli kreditlar joriy qilindi. Natijada 630 mlrd. soʻm miqdorida 2197 ta modulli kreditlar ajratildi.

Tadbirkorlar va aholini kreditlashda inson omili ishtirok etmaydigan yangi skoring tizimiga asoslangan Anderrayting yoʻlga qoʻyildi. Avvalgi 5 pogʻonali kreditlash tizimi 2 pogʻonaliga tushirildi (2,5 trln. soʻm miqdorida 1964 ta kredit maʼqullandi).

Moliyaviy rejalashtirish ishlarini avtomatlashtirish yoʻnalishida Germaniyaning SAP kompaniyasi dasturi asosida moliyaviy prognozlashtirish tizimi ishga tushirildi.

CERT xalqaro standartlashtirish tashkiloti bilan hamkorlikda “antikorrupsiya” tizimi yoʻlga qoʻyildi.

Chakana biznes yoʻnalishida ishlayotgan barcha xodimlarni KPI tizimi asosida ragʻbatlantirilishi amalga tatbiq qilindi.

Raqamli bank xizmatlarini koʻrsatish yoʻlida aholi uchun mutlaqo yangi 58 ta xizmat turini oʻz ichiga olgan “JOYDA” mobil ilovasi ishga tushirildi. Ilova bilan birgalikda xizmat va tovarlarni isteʼmol krediti hisobiga masofadan sotib olish imkonini beruvchi elektron savdo maydonchasi (marketpleys) tashkil etildi.

Bank xizmatlarini mijozlarga yaqinlashtirish maqsadida 42 ta bank xizmatlari ofisi va 89 ta oʻz-oʻziga xizmat koʻrsatish markazi (24/7) tashkil etildi.

Yigʻilishda Boshqaruv aʼzolari diqqati Bankni 2021 yilda strategik rivojlantirish boʻyicha belgilangan rejalarga qaratilib, unga baʼzi oʻzgartishlar kiritildi.

2021 yilda Bank umumiy aktivlari hajmini 52,2 trln. soʻmga, kredit portfelini 44,4 trln. soʻmga hamda yuridik va jismoniy shaxslarning jami depozitlari qoldigʻini 11 trln. soʻmga yetkazish rejalashtirilgan.

Iqtisodiyotni rivojlantirish, tadbirkorlikni qoʻllab-quvvatlash hamda istiqbolli loyihalarni moliyalashtirish maqsadida jami 488 ta loyihaga 8,3 trln. soʻm kreditlar ajratilishi belgilandi.

Jumladan, 16 ta yirik loyihaga 3,3 trln. soʻm, hududlarni rivojlantirish dasturlari doirasidagi 283 ta loyihaga 4,1 trln. soʻm, boshqa yoʻnalishlardagi loyihalar (189 ta) uchun esa 900 mlrd. soʻm hajmida kredit mablagʻlari ajratiladi.

Yigʻilish yakunida kun tartibidagi masalalar boʻyicha tegishli qarorlar qabul qilindi.

Bank Axborot xizmati

Вернуться назад

2904

Другие новости