Bank strukturasi

Axborot texnologiyalari departamenti bankning barcha raqamli tizimlari va dasturlarini ishlatish, rivojlantirish va xavfsizligini ta’minlaydi. Departament bank axborot tizimlarini boshqarish, texnik qo‘llab-quvvatlash, yangi IT yechimlarni joriy qilish, ma’lumotlar xavfsizligini ta’minlash hamda server va tarmoq infratuzilmasining barqaror ishlashini nazorat qilish bilan shug‘ullanadi.

Kreditlarni ma’qullash departamenti mijozlarning kredit arizalarini tahlil qiladi, qarz oluvchining tavakkalchilik darajasi va to‘lov qobiliyatini mustaqil baholaydi hamda kredit ajratish bo‘yicha asosli qaror qabul qilishni ta’minlaydi. Departament anderrayting jarayonining shaffofligini oshirish, skoring modellari va qaror qabul qilish algoritmlarini joriy etish orqali defolt risklarini aniqroq prognoz qilishga xizmat qiladi.

Ma’muriy xo‘jalik departamenti bank tarmoqlarini moddiy-texnik qo‘llab-quvvatlash, xo‘jalik ishlarini tashkil etish, bank binolarida qurilish, ta’mirlash va rekonstruksiya ishlarini olib borish bilan shug‘ullanadi. Shuningdek, bank bino va inshootlariga texnik xizmat ko‘rsatishni muvofiqlashtirib, energiya samaradorligi va xavfsiz mehnat sharoitlarini ta’minlaydi.

Komplaens-nazorat departamenti bank faoliyatining amaldagi qonunchilik, regulyator talablari va xalqaro standartlarga muvofiqligini ta’minlaydi. Departament komplaens-risklarni boshqaradi, ishbilarmonlik etikasi va halollik tamoyillarini mustahkamlaydi, shuningdek AML va sanksiyalarga rioya etilishi ustidan nazorat olib boradi.

Marketing departamenti bankning marketing siyosatini shakllantirish va amalga oshirish, brend hamda ijobiy imijini mustahkamlash bilan shug‘ullanadi. Departament bank mahsulot va xizmatlarini targ‘ib qiladi, marketing strategiyalarini ishlab chiqadi va ularni OAV, raqamli platformalar hamda boshqa kommunikatsiya kanallari orqali jamoatchilikka yetkazadi.

Operatsion departament bankning operatsion biznes jarayonlarini ishlab chiqish, kuzatish, optimallashtirish va avtomatlashtirishda иштирок etadi. Departament mijozlarning bank hisobvaraqlari bilan bog‘liq amaliyotlarni, valyuta ayirboshlash, omonatlar, xalqaro pul o‘tkazmalari, to‘lovlar va bank kartalari bilan bog‘liq jarayonlarni monitoring qiladi, shuningdek axborot reyestrlari bilan ishlashni nazorat qiladi.

Raqamli biznes departamenti bankning masofaviy xizmat ko‘rsatish kanallarini rivojlantiradi va boshqaradi. Departament yuridik va jismoniy shaxslar uchun mobil va internet bank xizmatlarini ishlab chiqish, joriy etish va takomillashtirish, raqamli mahsulotlar orqali mijozlarga qulay va tezkor bank xizmatlarini taqdim etish hamda mijozlar tajribasini yaxshilashga qaratilgan loyihalarni amalga oshiradi.

Axborotlarni muhofaza qilish markazi bank ma’lumotlarining maxfiyligi, yaxlitligi va ulardan foydalanish imkoniyatini himoya qilishga qaratilgan. Markaz axborot xavfsizligi bo‘yicha treninglar o‘tkazadi, ruxsatsiz kirishlarning oldini olish uchun monitoring olib boradi, kiberxavflarga qarshi choralar ko‘radi hamda muntazam audit, pentest va DLP tizimlari orqali bank axborot infratuzilmasi xavfsizligini kuchaytiradi.

Investitsion banking departamenti IPO/SPO va obligatsiyalar, jumladan yevroobligatsiyalar chiqarish orqali kapital bozoriga chiqish, sindikatli moliyalashtirishni jalb qilish va tashkilotlarni xalqaro kapital bozorlariga tayyorlash bo‘yicha xizmatlar ko‘rsatadi. Departament shuningdek IFRS, kredit reytinglari, ESG standartlari, yashil moliya va risklarni boshqarish bo‘yicha kompleks yechimlarni taqdim etadi.

Mikro va kichik biznes departamenti mikro va kichik tadbirkorlik subyektlarini qo‘llab-quvvatlashga qaratilgan. Departament biznes ehtiyojlariga mos moliyaviy va nomoliyaviy bank mahsulotlarini ishlab chiqadi, zamonaviy texnologik instrumentlar orqali biznes jarayonlarini avtomatlashtirishga yordam beradi hamda kichik biznesning bozor o‘zgarishlariga tez moslashishini ta’minlaydi.

Kredit monitoringi va nazorati departamenti bank kredit portfeli sifatini nazorat qiladi. Departament kredit berilgandan so‘ng mijozlarning moliyaviy holati, to‘lov intizomi va kredit shartlarining bajarilishini doimiy kuzatadi, risklarni erta aniqlaydi, muammoli kreditlarning oldini olish bo‘yicha choralar ishlab chiqadi va zarurat tug‘ilganda restrukturizatsiya hamda to‘lov grafiklarini optimallashtirish choralarini ko‘radi.

Qurilish materiallari sanoatini rivojlantirish departamenti qurilish materiallari sanoatida faoliyat yurituvchi 10 mingdan ortiq tadbirkorlik subyektlarining barqaror rivojlanishini va ishlab chiqaruvchi korxonalar samarali ishlashini ta’minlashga qaratilgan. Departament eksportyor korxonalarga axborot va marketing ko‘magi beradi, eksport-import muammolarini aniqlab yechimlar ishlab chiqadi, investitsiya loyihalarini moliyalashtirish va ishga tushirish jarayonini nazorat qiladi.

Xalqaro moliyaviy hisobotlar va konsalting departamenti bankning moliyaviy hisobotlarini milliy standartlardan xalqaro moliyaviy hisobot standartlariga transformatsiya qiladi, to‘liq IFRS hisobot paketini tayyorlaydi hamda tashqi auditorlar, reyting agentliklari va investorlar bilan hamkorlik qiladi. Shuningdek, departament mijozlarga IFRS hisobotlarini tayyorlash, moliyaviy tahlil tizimlarini joriy etish, strategiyalar ishlab chiqish va korporativ moliya bo‘yicha konsalting xizmatlarini ko‘rsatadi.

Moliyaviy menejment markazi biznes-rejani tuzish va tahlil qilish, SAPni rivojlantirish hamda bank mahsulotlari va xizmatlari samaradorligini tahlil qilish xizmatlaridan iborat. Markaz byudjetni shakllantirish, maqsadli ko‘rsatkichlarga erishishni monitoring qilish, moliyaviy modellarni tahlil qilish, xarajatlarni optimallashtirish va daromadlilikni prognozlash orqali bankning uzoq muddatli moliyaviy barqarorligini ta’minlaydi.

Risk-menejment departamenti bank faoliyatida yuzaga kelishi mumkin bo‘lgan risklarni aniqlash, baholash, monitoring qilish va nazorat qilish bilan shug‘ullanadi. Departament xalqaro standartlar va regulyator talablari asosida risklarni boshqarish tizimini takomillashtiradi, stress-testlar o‘tkazadi, kredit, bozor va operatsion risklarni tahlil qiladi hamda moliyaviy barqarorlikni ta’minlashga xizmat qiladi.

Ijroni boshqarish va rivojlantirishni tahlil qilish departamenti qonunlar, prezident va hukumat hujjatlari, Markaziy bank hamda bank boshqaruvi qarorlarining tarkibiy bo‘linmalar tomonidan o‘z vaqtida bajarilishi ustidan tizimli nazoratni amalga oshiradi. Shuningdek, jismoniy va yuridik shaxslarning yozma, og‘zaki va elektron murojaatlarini hisobga oladi, ko‘rib chiqishni muvofiqlashtiradi hamda javob xatlari yuborilishi ustidan yagona nazorat tizimini ta’minlaydi.

Loyiha boshqaruvi departamenti bankning strategik va operatsion loyihalarini rejalashtirish, muvofiqlashtirish va nazorat qilishni таъминlaydi. Departament yagona loyiha boshqaruvi metodologiyalarini joriy qiladi, muddatlar, byudjet va natijalarni monitoring qiladi, biznes bo‘linmalari hamda IT jamoalar o‘rtasida samarali hamkorlikni yo‘lga qo‘yadi.

Sustainable finance departamenti bank portfelini barqaror moliyalashtirish nuqtai nazaridan tahlil qiladi, “yashil” va barqaror portfel ulushini oshirishga xizmat qiladi hamda barqaror moliyalashtirish mahsulotlarini ishlab chiqadi. Departament tashqi hamkorlar, investorlar va xalqaro tashkilotlar bilan aloqalarni rivojlantiradi, ESG kun tartibini ommalashtiradi hamda bankning ESG va nomoliyaviy hisobotlarini tayyorlashni muvofiqlashtiradi.

Premium banking markazi Premium va Private segment mijozlariga kompleks xizmat ko‘rsatishga ixtisoslashgan. Markaz individual moliyaviy yechimlar, investitsion va konsalting xizmatlari, eksklyuziv bank va lifestyle servislarini taqdim etadi, hamkorlar ekotizimini rivojlantiradi va yuqori darajadagi shaxsiy servis orqali mijozlar uchun uzoq muddatli qiymat yaratadi.