"Hurmatli hamkasblar va qadrli mijozlarimiz!

Korrupsiya – jamiyat taraqqiyotiga toʻsiq boʻlayotgan eng xavfli illat. Shu bois korrupsiyaga qarshi kurash dunyo hamjamiyati oldida turgan eng dolzarb masalalardan biriga aylangan.

Mamlakatimizda korrupsiyaning oldini olish va unga qarshi kurashish, jamiyatning barcha sohalarida korrupsion holatlarni keltirib chiqaruvchi omillarga chek qoʻyishga qaratilgan keng koʻlamli islohotlar olib borilmoqda. Oʻzsanoatqurilishbank tomonidan ushbu islohotlar doirasida qator chora-tadbirlar amalga oshirilmoqda. Xususan, bu borada korrupsiyaga qarshi kurashish boʻyicha alohida tuzilma tashkil etilib, aniq vazifalar belgilab berildi.

Azizlar! Prezidentimiz taʼbiri bilan aytganda, jamiyatimizning barcha aʼzolari “halollik vaksinasi” bilan emlanmas ekan, oʻz oldimizga qoʻygan yuksak marralarga erisha olmaymiz. Shuning uchun barchamiz bugungi tinchlik-osoyishtalik hukm surgan yurtimizda adolat tamoyillari asosida halol mehnat qilishimiz zarur va shart. Zero, har birimiz umid bildirgan kelajak davomchilarimiz faqat va faqat amallarimizdan andoza oladi.

Men mazkur murojaatim bilan Sizlarni Oʻzsanoatqurilishbank tizimida korrupsion holatlar kuzatilganda yoki shubha tugʻdiruvchi va noqonuniy holatlar yuz berganida aloqa kanallarimiz orqali murojaat qilishga chaqirib qolaman.

Unutmang, murojaatingiz maxfiyligi kafolatlanadi!"