Yangiliklar

O‘zsanoatqurilishbank va YETTB hamkorligida tadbirkorlikni qo‘llab-quvvatlashga qaratilgan amaliy tadbirlar

Joriy yil 19-21-may kunlari O‘zsanoatqurilishbank hamda Yevropa tiklanish va taraqqiyot banki (YETTB) hamkorligida mamlakatimizdagi mikro, kichik va o‘rta biznes subyektlarini qo‘llab-quvvatlashga qaratilgan qator amaliy tadbirlar o‘tkazildi.

Tadbirlar doirasida bank va YeTTB vakillari Buxoro, Navoiy va Samarqand viloyatlarida faoliyat yuritayotgan ishlab chiqarish obyektlariga tashrif buyurib, tadbirkorlik subyektlari faoliyati, investision salohiyati va moliyaviy ehtiyojlari bilan yaqindan tanishdi. Ayniqsa, eksportga yo‘naltirilgan, innovasion g‘oyalarga asoslangan loyihalarga alohida e’tibor qaratildi. Shu orqali tadbirkorlarning ehtiyojlariga muvofiq moliyaviy yordam va maslahat xizmatlari ko‘rsatish imkoniyatlari muhokama etildi. 

Seminar va amaliy uchrashuvlar – bilim va tajriba almashinuvi

Buxoro shahrida tashkil etilgan yirik seminarda mashhur biznes-trener Ulug‘bek Xojiahmedov ishtirok etib, biznesni strategik boshqarish va muvaffaqiyatli rivojlantirish borasidagi tajribalari bilan o‘rtoqlashdi. Shuningdek, YeTTB va bank mutaxassislari tomonidan grant dasturlari, maslahat xizmatlari va moliyaviy qo‘llab-quvvatlash mexanizmlari haqida atroflicha ma’lumot berildi.

Samarqand shahridagi amaliy formatdagi uchrashuv esa, bankning amaldagi mijozlari va kredit dasturlariga qiziqish bildirgan tadbirkorlar ishtirokida o‘tkazildi. Ular YeTTB va bank hamkorligida taqdim etilayotgan moliyaviy imkoniyatlardan qanday foydalangani, bu orqali faoliyatlarida qanday natijalarga erishgani haqida fikr bildirdi. 

Iqtisodiy o‘sish va tadbirkorlikni rag‘batlantirish yo‘lida

Barcha tadbirlardan ko‘rinadiki, O‘zsanoatqurilishbank va YeTTB tomonidan amalga oshirilayotgan hamkorlik dasturlari tadbirkorlar uchun muhim ahamiyat kasb etmoqda. Ushbu tashabbuslar orqali biznes subyektlari uchun moliyaviy resurslar va konsalting xizmatlariga keng yo‘l ochilib, ularning barqaror o‘sishi va hududlar iqtisodiyoti rivojiga turtki bermoqda.

Bank kelgusida ham YeTTB kabi xalqaro hamkorlar bilan birgalikda tadbirkorlik muhitini yana-da takomillashtirish, yangi ish o‘rinlari yaratish va mahalliy biznesni global bozorlarga olib chiqishni maqsad qilgan.

Bank axborot xizmati

Orqaga qaytish

468

Boshqa yangiliklar