"O'zsanoatqurilishbank"da korrupsiyaga qarshi kurashga bag'ishlangan o'quv-treninglar o'tkazildi

"O'zsanoatqurilishbank"da xodimlarning huquqiy savodxonligini oshirish, ularda korrupsiyaga qarshi ongli yondashuvni shakllantirish hamda manfaatlar to'qnashuvining oldini olish maqsadida o'quv-trening mashg'ulotlari muntazam tashkil etib kelinmoqda.

Mamlakatimizda Prezidentimizning 2020-yil 29-iyundagi "O'zbekiston Respublikasida korrupsiyaga qarshi kurashish tizimini takomillashtirish bo'yicha qo‘shimcha chora-tadbirlar to'g'risida"gi farmoni ijrosi doirasida davlat va jamiyat hayotining barcha jabhalarida shaffoflikni ta'minlash, korrupsiya omillarini aniqlash va ularni bartaraf etishga qaratilgan keng ko‘lamli islohotlar amalga oshirilmoqda.

Bank tizimida ham ushbu yo‘nalishda amaliy ishlar izchil olib borilmoqda. Xususan, ochiqlik va oshkoralik tamoyillarini qaror toptirish, manfaatlar to'qnashuviga yo'l qo'ymaslik, xodimlarning mas'uliyati va huquqiy madaniyatini yuksaltirish ustuvor vazifalardan biri sifatida belgilangan.

Joriy yilning may-iyun oylari davomida ichki audit, ma'muriy xo'jalik, buxgalteriya, tranzaksion banking, kreditlash, mikro va kichik biznes yo‘nalishlari hamda Andijon, Xonobod, Bunyodkor, Namangan, Farg‘ona, Kirguli, Qo'qon va Uchtepa bank tarmog'i bo'linmalari xodimlari uchun maxsus o‘quv-treninglar tashkil etildi.

Mashg'ulotlar davomida ishtirokchilar "O'zbekiston Respublikasida korrupsiyaga qarshi kurashish sohasidagi davlat siyosati: ustuvor yo'nalishlar va xorijiy tajriba" mavzusida bilimlarga ega bo'ldi.

Shuningdek, bank doirasida qabul qilingan ichki normativ hujjatlar — "Korrupsiyaga qarshi kurashish siyosati", "Odob-axloq kodeksi", "Manfaatlar to'qnashuvini oldini olish siyosati", "Manfaatlar to'qnashuvini boshqarish to'g'risida"gi nizomlar mazmun-mohiyati keng tahlil qilindi.

Erkin muloqot ruhida o'tgan o'quv mashg'ulotlarida ishtirokchilar amaliyotda uchrashi mumkin bo'lgan vaziyatlar yuzasidan o'z savollariga javob olishdi.

Mashg'ulotlar yakunida esa bilim va ko'nikmalarni baholash maqsadida test sinovlari ham tashkil etildi.

Bank axborot xizmati

Orqaga qaytish

944

Boshqa yangiliklar