Tadbirkorlar bilan ochiq muloqotlar: murojaatlar va takliflar o‘rganildi

24.06.2026 12:56

Prezidentimizning tadbirkorlar bilan navbatdagi ochiq muloqotiga tayyorgarlik doirasida Samarqand viloyatining Oqdaryo va Payariq tumanlarida tadbirkorlar hamda fuqarolarning murojaat va takliflarini o‘rganishga bag‘ishlangan uchrashuvlar o‘tkazildi.

O‘zsanoatqurilishbank Boshqaruvi raisining birinchi o‘rinbosari Anvar Ergashev ishtirokida tashkil etilgan muloqotlarda tadbirkorlik faoliyatini yanada rivojlantirish, investitsiya loyihalarini moliyalashtirish, kredit mablag‘laridan samarali foydalanish, yangi ish o‘rinlari yaratish hamda biznes vakillarini qiynayotgan masalalar muhokama qilindi.

Dastlab Oqdaryo tumani Soliq inspeksiyasi binosida o‘tkazilgan uchrashuvda tadbirkorlar o‘zlarini qiziqtirgan masalalar yuzasidan murojaat va takliflarini bildirdilar. Mutasaddilar tomonidan ko‘tarilgan masalalar yuzasidan zarur tushuntirishlar berilib, ayrim murojaatlarni ijobiy hal etish bo‘yicha tegishli chora-tadbirlar belgilandi.

Shuningdek, Payariq tumanining Toshhovuz mahallasida bo‘lib o‘tgan uchrashuvda tadbirkorlar va fuqarolarning murojaatlari tinglandi. Muloqot davomida biznesni rivojlantirish, investitsiya loyihalarini qo‘llab-quvvatlash, kreditlash masalalari hamda yangi ish o‘rinlari yaratishga oid takliflar muhokama qilindi.

Ta’kidlanganidek, bunday ochiq muloqotlar tadbirkorlik subyektlarini qo‘llab-quvvatlash, mavjud muammolarni joyida hal etish hamda hududlarning iqtisodiy salohiyatini yanada oshirishda muhim ahamiyat kasb etadi.

Boshqa yangiliklar