“O‘zsanoatqurilishbank” ATBning rasmiy munosabati

Joriy yilning 20-avgust kuni YouTube platformasida fuqaro E. O‘ (ismi sharifi o‘zgartirilgan) tomonidan “O‘zsanoatqurilishbank” ATBning Sirdaryo mintaqaviy xizmatlar ofisida eski turdagi AQSh dollarini yangi turdagi dollarga almashtirish bo‘yicha bildirilgan e’tirozli videomurojaat yuzasidan quyidagilarni ma’lum qilamiz:

Ta’kidlash joizki, Bank amaliyotida bevosita eski turdagi banknotlarni yangisiga almashtirish xizmati mavjud emas. Biroq, ushbu yo‘nalishda quyidagi operatsiyalar amalga oshiriladi:

- chet el valyutasini sotib olish va sotish;

- chet el valyutasini yiriklashtirish yoki maydalash;

- bir turdagi chet el valyutasini boshqa turdagi chet el valyutasiga almashtirish;

- shikastlangan va muomalaga yaroqsiz banknotlarni qabul qilish hamda ularni shu turdagi banknotlarga almashtirib berish.

Mazkur jarayonlarda O‘zbekiston Respublikasi qonunchiligi va Bankning ichki me’yoriy hujjatlariga muvofiq, shikastlangan, siyqalangan yoki ifloslangan banknotalar komissiya to‘lovi evaziga qabul qilinadi. Ushbu komissiya bank tomonidan banknotlarni saqlash, tashish va emitent chet davlat banklariga yuborish xarajatlarini qoplash maqsadida belgilanadi.

Bu borada Bank xodimlari tomonidan murojaatchiga videoyozuv orqali ham batafsil tushuntirish berilgan.

“O‘zsanoatqurilishbank” ATB o‘z faoliyatida shaffoflik va ochiqlik tamoyillariga tayanadi hamda mijozlar murojaatlarini amaldagi qonunchilik asosida ko‘rib chiqib, har bir murojaatga xolis munosabat bildirishga intiladi.

“O‘zsanoatqurilishbank” ATB Tashqi aloqalarni muvofiqlashtirish xizmati

Orqaga qaytish

2339

Boshqa yangiliklar