SQB yoshlari: raqamli xavfsizlik va barqaror kelajak

10.09.2026 07:06

“O‘zsanoatqurilishbank” ATBda “Yoshlar kuni” doirasida xodimlarning zamonaviy bilim va ko‘nikmalarini rivojlantirishga qaratilgan navbatdagi uchrashuv tashkil etildi. Tadbirda kiberxavfsizlik, ma’lumotlarni himoya qilish hamda barqaror moliya yo‘nalishining bank faoliyatidagi ahamiyati muhokama qilindi.

Bugungi kunda raqamli texnologiyalar moliya tizimining ajralmas qismiga aylanib bormoqda. Bank xizmatlarining raqamlashtirilishi mijozlar uchun qulaylik yaratish bilan birga, axborot xavfsizligini ta’minlash mas’uliyatini ham oshiradi. Shu nuqtayi nazardan, raqamli muhitda xavfsiz ishlash ko‘nikmalarini shakllantirish va kiberxavflardan xabardor bo‘lish har bir xodim uchun muhim ahamiyatga ega.

Uchrashuv davomida ishtirokchilarga shaxsiy va korporativ ma’lumotlarni himoya qilish, kiberhujumlarning oldini olish hamda raqamli vositalardan xavfsiz foydalanish bo‘yicha tavsiyalar berildi. Shuningdek, axborot xavfsizligiga tahdid solishi mumkin bo‘lgan holatlarni o‘z vaqtida aniqlash, shubhali havola va xabarlarga nisbatan ehtiyotkor bo‘lish, maxfiy ma’lumotlar bilan ishlashda belgilangan talablarga rioya etish masalalariga e’tibor qaratildi.

Tadbirning yana bir muhim yo‘nalishi barqaror moliya tamoyillariga bag‘ishlandi. Ishtirokchilarga ESG tamoyillari, yashil moliya va barqaror rivojlanishning mazmuni, shuningdek, ularning bank faoliyatidagi o‘rni haqida ma’lumot berildi.

ESG tamoyillari ekologik, ijtimoiy va korporativ boshqaruv omillarini hisobga olishni nazarda tutadi. Ushbu yondashuv moliyaviy qarorlarni qabul qilishda nafaqat iqtisodiy samaradorlik, balki atrof-muhitga ta’sir, ijtimoiy mas’uliyat va boshqaruv sifatini ham inobatga olishga xizmat qiladi. Yashil moliya esa ekologik barqarorlikni qo‘llab-quvvatlovchi loyihalarni moliyalashtirish va resurslardan oqilona foydalanishni rag‘batlantirishda muhim ahamiyat kasb etadi.

Mazkur mavzularning yosh xodimlar ishtirokida muhokama qilinishi zamonaviy bank faoliyatida raqamli savodxonlik va barqaror rivojlanish tamoyillari o‘zaro chambarchas bog‘liq ekanini anglashga yordam beradi. Zero, xavfsiz raqamli muhitni shakllantirish va mas’uliyatli moliyaviy yondashuvni rivojlantirish bank tizimining uzoq muddatli barqarorligi uchun muhim omillardandir.

“O‘zsanoatqurilishbank” ATBda yosh xodimlarning kasbiy salohiyatini oshirish, ularning zamonaviy bilim va ko‘nikmalarini rivojlantirish hamda yangi yo‘nalishlar bo‘yicha xabardorligini mustahkamlashga qaratilgan uchrashuvlar alohida ahamiyatga ega. Bunday tadbirlar yoshlarning kasbiy rivojlanishiga ko‘maklashish bilan birga, bankda innovatsion fikrlash, axborot xavfsizligi madaniyati va barqaror rivojlanish tamoyillarini mustahkamlashga xizmat qiladi.

Boshqa yangiliklar