Bank xodimlari mahsulot joriy qilishda risklarning oldini olishga qaratilgan ilg‘or ko‘nikmalar orttirdi

O‘zsanoatqurilishbank xodimlari uchun risk madaniyatini rivojlantirish loyihasi doirasida o‘quv kurslari o‘tkazildi. Mashg‘ulotlar Rossiyaning “Akselerator FRII” kompaniyasi murabbiylari tomonidan olib borildi.

O‘zsanoatqurilishbankni transformatsiya qilish jarayonida tizimning barcha yo‘nalishlari qatori risk menejmenti ham xalqaro standartlarga muvofiqlashtirildi. Risklarni samarali boshqarish va takomillashtirib borishga qaratilgan tizimli ishlar yo‘lga qo‘yildi.

O‘quv kursida 5 ta mahsulot bo‘yicha biznes tuzilmalar xodimlaridan iborat jamoalar shakllantirildi. Ularga uch bosqichli ta’lim dasturi bo‘yicha bilim va ko‘nikmalar berildi.

Xususan, dastlabki o‘quv mashg‘uloti bank mahsulotlari kompetensiyalarini tashxislashdan boshlandi. Mahsulot menejerlarining kompetensiyalari test orqali baholanib, kuchli va kuchsiz tomonlari aniqlandi. Ularga kasbiy, texnik ko‘nikmalar (hard skills) berilib, dasturni metodologik yangilash, ichki hujjatlar va mahsulotlar bilan ishlash jarayonlari o‘rgatildi.

Navbatdagi bosqichda mahsulot kompetensiyalarini rivojlantirish bo‘yicha intensiv mashg‘ulotlar olib borildi. Ishtirokchilar trenerlar ko‘magida mahsulotlar gipotezalarini ishlab chiqishdi.

– Natijada, bank xodimlari fleksif metodologiyalar, amaliy vositalar, freymvorklar, artefaktlar kabi mahsulot yaratish va uni yuritishning samarali vositalari bilan tanishishdi, – deydi “Akselerator FRII” kompaniyasi bosh direktori Dmitriy Kalayev. – Shuningdek, ishtirokchilar olgan bilimlarini amaliy qo‘llagan holda, tajribali ekspert-trenerlar bilan 5 ta mahsulot gipotezasi (MVP)ni ishlab chiqib, uni amaliyotga joriy qilish bo‘yicha yangi ko‘nikmalarga ega bo‘ldi.

Bundan tashqari, o‘quv kursi mahsulotlar ishlab chiqish bo‘yicha jamoalarning kuchli va zaif tomonlarini baholashga imkon berdi. Ularni yanada rivojlantirish bo‘yicha tavsiyalar ishlab chiqildi.

Bankda yangi mahsulotlar bilan ishlash uchun yagona va shaffof jarayon shakllantirildi.

– O‘quv dasturi davomida biz, menejerlar komfort zonadan chiqib, yangi bank mahsulotini yaratishda muammolarni aynan mijoz nazari bilan hal qilishga qaratilgan yangi bilimlar oldik, – deydi “O‘zsanoatqurilishbank” ATB Chakana biznes departamenti menejeri Marjona Yusupova. – Mijoz istagi, uning bank mahsuloti yoki xizmatidan foydalanishga tayyorligi, shuningdek, mahsulot iqtisodi, uni joriy qilish sabablarini topish va tahlil qilishning zamonaviy usullarini o‘rgandik.

Kurs so‘ngida 20 nafar xodim sinov testlaridan muvaffaqiyatli o‘tib, xalqaro sertifikatga ega bo‘ldi.

Bank Axborot xizmati

Orqaga qaytish

1951

Boshqa yangiliklar