«BankExpo – 2019»: O‘zsanoatqurilishbank – investitsion loyihalarni moliyalashtirishda eng yaxshi bank

Bugun, 2019-yil 13-aprel kuni “BankExpo – 2019” milliy ko‘rgazmasida O‘zsanoatqurilishbank “Investitsion loyihalarni moliyalashtirishda eng yaxshi bank” nominasiyasi bo‘yicha taqdirlandi.

Poytaxtimizdagi “O‘zekspomarkaz” majmuida uch kun davom etgan “BankExpo – 2019” milliy ko‘rgazmasida O‘zsanoatqurilishbank ham faol ishtirok etdi. Ayniqsa, bank stendiga tadbirkor va investorlarning qiziqishi katta bo‘ldi.

Bank stendining “Kredit supermarketi” hamda “Maslahat burchagi” bo‘limlarida tashrif buyuruvchilarga yurtimizda yaratilgan ishbilarmonlik hamda investitsiya muhiti, bu borada mazkur Bank takliflari, shu jumladan xorijiy kredit liniyalar xususida batafsil ma’lumot berildi.

Qayd etish joiz, O‘zsanoatqurilishbank xorijiy kredit liniyalarini jalb qilishda Yevropaning Sredit Suisse (Shveytsariya), Raiffeisen Bank International AG (Avstriya), Landesbank Baden-Wuerttemberg, Commerzbank, ODDO BHF, KFW Ipex-Bank (Germaniya), Gazprombank (Rossiya), shuningdek, Xitoy, Turkiya va Janubiy Koreya Eksimbanklari bilan hamkorlik qilib kelmoqda.

Joriy yilda Xalqaro Islom savdo-moliya korporatsiyasi, «Shinhan Bank» (Xitoy), «AK BARS Bank» (Rossiya)lar bilan savdoni moliyalashtirish yo‘nalishida istiqbolli kelishuvlarga erishildi.

Bank qoshida mahalliy tadbirkorlar va chet ellik investorlarining investitsiya faoliyatini har tomonlama qo‘llab-quvvatlash maqsadida tashkil etilgan Investitsiya faoliyatini muvofiqlashtirish va loyihalarni boshqarish markazi muvaffaqiyatli faoliyat yuritmoqda.

Markaz xodimlari investorlarga o‘z sarmoyalarini istiqbolli biznesga samarali yo‘naltirishga texnik jihatdan ko‘maklashmoqda. E’tiborlisi, markaz zimmasidagi ushbu xizmatlar “Yagona darcha” tamoyili asosida “kredit supermarketi” sifatida ko‘rsatilmoqda.

“BankExpo – 2019” ko‘rgazmasida O‘zsanoatqurilishbankning yangi brend ostidagi stendida, shuningdek, muassasa tizimida olib borilayotgan transformatsiya jarayonlari to‘g‘risida mufassal ma’lumot berildi.

Bank Axborot xizmati

Orqaga qaytish

1591

Boshqa yangiliklar