O‘zsanoatqurilishbank “Euromoney” mukofotlariga sazovor bo‘ldi

Joriy yilning 27-mart kuni London shahrida “Euromoney” xalqaro jurnali tomonidan Osiyo va Yevropa mamlakatlari bank-moliya sektori muassasalarini taqdirlash marosimi bo‘lib o‘tdi. Unda O‘zsanoatqurilishbank qator nufuzli nominatsiyalar bo‘yicha g‘olib deb topildi.

Jumladan, bank chakana xizmatlar sohasida eng ilg‘or, shuningdek, barqaror rivojlanish bo‘yicha O‘zbekistondagi eng faol moliya muassasasi sifatida tan olindi.

Ta’kidlash joiz, bank tizimida amalga oshirilayotgan transformatsiya doirasida chakana va premium segmentidagi mijozlarga yuqori darajada xizmat ko‘rsatish hamda samaradorlikni oshirish maqsadida innovatsion yondashuvlar joriy etildi.

Xususan, bankning tarixiy binosida individual va eksklyuziv xizmatlar ko‘rsatuvchi maxsus ofis tashkil etildi. Premium mijozlar uchun shaxsiy menejerlar tayinlanib, ular bilan bevosita va doimiy muloqot tizimi yo‘lga qo‘yildi. Aeroportda uchrashuv va transfer xizmatlari, mehmonxona va aviachiptalarni bron qilish, shuningdek, O‘zbekiston shaharlari bo‘ylab shaxsiy sayohatlarni o‘z ichiga olgan kompleks xizmatlar paketlari ishlab chiqildi.

Shuningdek, o‘tgan yil davomida bank tomonidan “yashil” bank yo‘nalishida ham keng ko‘lamli chora-tadbirlarni amalga oshirildi. Ekologik, ijtimoiy va korporativ boshqaruv (ESG) tamoyillarini joriy etish borasida alohida tuzilma tashkil etilib, sohaga oid me’yoriy hujjatlar ishlab chiqildi. Bankning moliyaviy rivojlanishni ijtimoiy mas’uliyat bilan uyg‘unlashtirgan holda olib borayotgani “Sustainable Fitch” xalqaro reyting agentligi tomonidan yuqori baholanib, ESG reytingini qo‘lga kiritishga omil bo‘ldi.

Bundan tashqari, bank tarmog‘iga tegishli binolar xalqaro EDGE auditiga muvofiq o‘rganilib, ularning ekologik samaradorligi baholanmoqda. Hozirga qadar 20 ta binoning “yashil” standartlarga mosligi tasdiqlanib, xalqaro EDGE sertifikati taqdim etildi.

Shuningdek, bank ishlab chiqarish jarayoni va mijozlari tomonidan ajratiladigan issiqxona gazlari chiqindilari hisob-kitobini olib boryapti. Ushbu hisobotlar tugallanganidan so‘ng, uglerod izini kamaytirish bo‘yicha maxsus siyosat ishlab chiqilishi va amalga oshirilishi rejalashtirilgan.

“Euromoney” xalqaro jurnali ekspertlari fikricha, O‘zsanoatqurilishbank xalqaro standartlarga mos ravishda rivojlanib, O‘zbekiston bank sektorida yetakchi o‘rinni egallamoqda.

Bank axborot xizmati

Orqaga qaytish

2128

Boshqa yangiliklar