Yangiliklar

Oʻzsanoatqurilishbank koʻmagida ikkita yirik ishlab chiqarish yoʻlga qoʻyildi


13.09.2022

Oʻzsanoatqurilishbank koʻmagida ikkita yirik ishlab chiqarish yoʻlga qoʻyildi

Oʻzsanoatqurilishbank tomonidan sanoat tarmoqlarini moliyalashtirish faol amalga oshirilmoqda. Mustaqilligimizning 31-yillik shodiyonalari arafasida ana shunday loyihalarning ikkitasi foydalanishga topshirildi.

          Prezidentimiz raisligida shu yil 11-mart kuni sanoat kooperatsiyasi va mahalliylashtirishni yanada kengaytirish masalalari boʻyicha oʻtkazilgan videoselektor yigʻilishida korxonalarni zamon talabiga uygʻunlashtirish, mahsulot sifatini oshirishga koʻmaklashish boʻyicha vazifalar yuklatildi. Unda bugungi oʻzgaruvchan sharoitda iqtisodiyot barqarorligini taʼminlashning eng samarali yoʻli bu – ichki imkoniyatlarni ishga solish, import boʻlayotgan ayrim mahsulotlarni oʻzimizda ishlab chiqarish va sanoatni yanada rivojlantirish ustuvor yoʻnalish boʻlishi kerakligi taʼkidlangan edi.

          Oʻzsanoatqurilishbank tomonidan har yili sanoat tarmogʻiga oid oʻnlab loyihalar ishga tushirilib, ular muassasaning moliyaviy koʻmagida ilgʻor texnologiyalar bilan jihozlanishi, xomashyo resurslarimizni chuqur qayta ishlashi, eksport salohiyatiga egaligi, koʻp miqdorda ish joylarini tashkil qilishi bilan eʼtiborga molikdir.

          Mamlakatimizning sanoat zonalaridan beri Angren shahrida ish boshlagan yangi zavod ham shunday imkoniyatlar bilan barpo etildi.

          “Central Asia chemicals” masʼuliyati cheklangan jamiyatiga qarashli ushbu zavod Italiya texnologiyalari bilan jihozlandi. Boshqaruv, ishlab chiqarish, laboratoriya, standartlashtirish, logistika kabi barcha jarayonlar xalqaro andozalarga muvofiqlashtirildi.

          Kir yuvish kukuni, suyuq sovun va gigiyenik vositalar uchun birlamchi kimyoviy mahsulotlar ishlab chiqarishga ixtisoslashtirilgan ushbu korxona uchun Bank tomonidan qariyb 10 mln. dollar miqdorida kredit ajratildi.

          – Injineriya faoliyatida Italiya dunyo boʻyicha peshqadam davlatlar qatoriga kiradi, – deydi “Central Asia Chemicals” MCHJ bosh direktori A.Botirov. – Biznesda ushbu mamlakat mutaxassislari bilan hamkorlikka kirishganimiz biz uchun oʻsish, katta natijadir.

          Zavodning bayram arafasida ishga tushirilishi angrenliklar uchun haqiqiy yangilik, bayram tuhfasi boʻldi. Sababi, u yerga hudud aholisining 100 nafari ishga jalb qilindi. Yillik ishlab chiqarish hajmi 11 ming tonnaga teng korxona mahsulotlari 100 foiz import oʻrnini bosuvchi hisoblanib, ularning 30 foizi Rossiya va MDH mamlakatlariga eksport qilinadi.

          – Bankning madadi bilan yaqin kunlarda yana bir sexni ishga tushiramiz, – deydi A.Botirov. – U yerda yiliga 48 ming tonna kir yuvish kukunini ishlab chiqarish koʻzda tutilgan.

          Yuqorida taʼkidlaganimizdek, shu kunlarda yana bir yangi korxona faoliyati yoʻlga qoʻyildi.        Xorazm viloyatining Urganch tumanida joylashgan mazkur korxona qurilish materiallari ishlab chiqarishga ixtisoslashtirilgan boʻlib, u yerda 70 ta yangi ish oʻrni yaratildi.

          Loyiha tashabbuskori “Zakirov” xususiy korxonasi. Umumiy miqdori 4,1 mln. dollar hajmidagi mablagʻ evaziga yangi zavod toʻla quvvatda ishlab chiqarish holatiga keltirildi. Bunda bank kredit mablagʻlari hisobiga Xitoydan uskunalar keltirib oʻrnatildi.

          Ochilish marosimida bugun hududlarda bunyodkorlik ishlari qizgʻin pallaga chiqqan bir paytda qurilish materiallari sanoati har jihatdan qoʻllab-quvvatlanayotgani, sohaga ilm-fan yutuqlari va innovatsiyalar keng jalb qilinib, mahalliylashtirishda ichki imkoniyatlardan samarali foydalanilayotgani mamnuniyat bilan qayd etildi.

          “Zakirov” xususiy korxonasining yangi zavodi ham ishlab chiqarishda toʻliq mahalliy xomashyodan foydalanish imkoniga ega. U yerda ichki va tashqi bozorga yiliga 3 ming tonna turli oʻlchamlarda 7 turdagi samorez va shrup mahsulotlari yetkazib beriladi.

          Ayni paytda eksport borasidagi reja 3 mln. dollar (umumiy mahsulotning qariyb 50 foizi) etib belgilangan. Bu borada dastlabki shartnomalar hozircha ozarbayjonlik hamkorlar bilan tuzildi.

Bank Axborot xizmati





Boshqa yangiliklar


Oxirgi yangilanish sanasi: 14.09.2022 17:01

JOYDA mobil ilovasi

Smartfondagi qulay ilova yordamida kunlik to'lovlarni amalga oshiring

playmarketappstore

up