Yangiliklar

Oʻzsanoatqurilishbank taʼlim kreditlarini taklif etmoqda


15.12.2021

Oʻzsanoatqurilishbank tomonidan joriy yilning sentyabr oyidan 1-dekabriga qadar 540 ga yaqin talaba-yoshlarga 4,9 mlrd. soʻmdan ziyod miqdorda taʼlim krediti ajratildi.

Bugungi kunda Oʻzsanoatqurilishbank tizimida respublikamizdagi oliy taʼlim tashkilotlari bakalavriatining kunduzgi taʼlim shakli hamda magistratura bosqichida toʻlov-kontrakt asosida tahsil olayotgan talaba-yoshlarga taʼlim kreditlari ajratib kelinmoqda.

Qarorga asosan taʼlim kreditlari Oʻzbekiston Respublikasi Markaziy bankining asosiy (14%) stavkasida ajratilmoqda. Bunda, Markaziy bankning asosiy stavkasi pasaytirilgan taqdirda, taʼlim krediti boʻyicha foiz stavkasi mutanosib ravishda pasayadi, lekin asosiy stavka oshirilgan taqdirda taʼlim krediti boʻyicha foiz stavkasi oʻzgarishsiz qoladi.

Kreditni rasmiylashtirish va uning qaytarilishida talabaning doimiy daromad manbaiga ega boʻlgan oila aʼzolari birgalikda qarz oluvchi sifatida qatnashishiga ruxsat etiladi. “Ijtimoiy himoya yagona reyestri”ga kirgan oilalar farzandlaridan taʼlim krediti uchun garov va kafilliklar talab etilmaydi. Kreditning asosiy qismi talabaning rasmiy oʻqish muddati tugagandan soʻng yettinchi oydan boshlab 7 yil davomida qaytariladi. 

Kredit oluvchidan quyidagi hujjatlar talab etiladi:

– taʼlim krediti olish toʻgʻrisidagi ariza;

– talaba va oliy taʼlim tashkiloti oʻrtasidagi toʻlov-kontrakt asosida oʻqish haqida belgilangan tartibda rasmiylashtirilgan shartnoma (kontrakt) va unga ilova qilinadigan hisob varaqasi/fakturasi (mavjud boʻlganda). Shartnoma (kontrakt)da oʻqishni tamomlashning belgilangan muddati va bir yil uchun toʻlov miqdori koʻrsatilgan boʻlishi lozim;

– bankning kredit siyosati va ichki tartibiga muvofiq taʼlim krediti qaytarilishining taʼminoti boʻyicha hujjat. Bunda «Ijtimoiy himoya yagona reyestri»ga kirgan oilalarning farzandlariga ajratiladigan taʼlim krediti boʻyicha garov va kafillik talab etilmaydi;

– «Ijtimoiy himoya yagona reyestri»ga kiritilganligini tasdiqlovchi maʼlumotnoma («Ijtimoiy himoya yagona reyestri»ga kiritilgan oilalar farzandlari uchun);

– bankning ichki hujjatlarida (siyosatida) belgilangan boshqa hujjatlar, shu jumladan, birgalikda kredit oluvchiga tegishli maʼlumot va hujjatlar.

Kredit oluvchi (birgalikda kredit oluvchi) yuqoridagi hujjatlarni bankka taqdim etish bilan bir vaqtda shaxsini tasdiqlovchi hujjatni, jumladan fuqarolik pasportini yoki shaxsning identifikatsiya ID-kartasini shaxsan koʻrsatadi. Bank taqdim etilgan hujjatlardan zarur koʻchirmalar va nusxalar olishga haqlidir.

Tijorat banklari kredit oluvchi tomonidan taʼlim krediti berishni soʻrab bankka taqdim qilingan ariza va unga ilova qilingan barcha hujjatlarni besh ish kuni mobaynida koʻrib chiqishi va taʼlim krediti shartnomasini imzolashi yoki kredit berishni rad etish toʻgʻrisida qaror qabul qilingan taqdirda, arizachiga kredit berishning rad etilishi sababi koʻrsatilgan holda javob xati berishi lozim.

Taʼlim krediti shartnomasi kredit oluvchi tomonidan taqdim etilgan talaba va oliy taʼlim tashkiloti oʻrtasidagi toʻlov-kontrakt asosida oʻqish haqidagi shartnoma (kontrakt)da koʻrsatilgan bir yillik toʻlov summasiga teng miqdordagi summaga tuziladi.

Bunda, keyingi oʻquv yili uchun toʻlov-kontrakt asosida oʻqish haqidagi shartnomada belgilangan toʻlov miqdori va taʼlim krediti olish toʻgʻrisidagi arizadan kelib chiqib, kredit miqdori taʼlim krediti shartnomasiga qoʻshimcha kelishuv imzolash orqali oshirib boriladi.  

Bank Axborot xizmati

Qoʻshimcha maʼlumot uchun: 1180 (qisqa raqam) +998 71 200-43-43





Boshqa yangiliklar


Oxirgi yangilanish sanasi: 15.12.2021 11:45

JOYDA mobil ilovasi

Smartfondagi qulay ilova yordamida kunlik to'lovlarni amalga oshiring

playmarketappstore

up