Bosh sahifa
Matbuot markazi
Yangiliklar
Oʻzsanoatqurilishbank tizimida “Data Warehouse” – maʼlumotlar ombori tatbiq etil

Yangiliklar

Oʻzsanoatqurilishbank tizimida “Data Warehouse” – maʼlumotlar ombori tatbiq etildi

24.07.2021 16:47

Oʻzsanoatqurilishbank tizimida maʼlumotlarga ishlov berish, saqlash va chuqur tahlil qilishga qaratilgan “Data Warehouse” (DWH) - maʼlumotlar ombori va “Business Intelligence” – biznes tahlil tizimi tatbiq etildi. Bu Bankning yangi biznes modeliga asoslangan transformatsiya jarayonlari doirasida amalga oshirildi.

Bugungi kunda isteʼmolchilarning mobil biznes-ilovalar va ijtimoiy tarmoqlar orqali muttasil oʻsib borayotgan oʻzaro onlayn muloqoti maʼlumotlarning katta hajmini yaratmoqda. Bu kompaniyalar uchun zarur maʼlumotlarni toʻplash, oʻz mijozlari hamda bozor tendensiyalari va mahsulotlari haqida yanada koʻproq axborotlarga ega boʻlish imkonini bermoqda.

Ammo, taʼkidlash joizki, maʼlumotlarni yigʻish va ulardan tijorat maqsadlarida foydalanish boshqa-boshqa masalalardir. Maʼlumotlarni samarali toʻplash va tahlil qilish toʻgʻri texnologiyalarni qoʻllash bilan tizimli yondashuvni talab etadi.

Shu bois Oʻzsanoatqurilishbank tizimida bugungi kunda xalqaro amaliyotda keng qoʻllanilayotgan maʼlumotlar ombori va biznes tahlil tizimi tatbiq etildi.

Endilikda Bankda bir nechta manbalardan olingan maʼlumotlarni saqlash, ularni tahlil qilish uchun ilgʻor vositalardan foydalanish hamda oʻrganilayotgan obyektlar toʻgʻrisida maʼlumot olishga sharoit tugʻiladi.

Tizim muassasa boshqaruviga Bank biznesi oʻtmishda qanday ish olib borgani va ayni paytda qaysi bosqichda ekanini bilish imkonini beradi, qolaversa, biznes uchun yangi imkoniyat eshiklarini ochadi.

Barcha hisobot va tahlillar DWH platformasida amalga oshirilishini hisobga olib, u nafaqat koʻp sonli ichki operatsion tizimlardan maʼlumotlarni bir joyda toʻplashini, balki maʼlum vaqtda ushbu tranzaksion tizimlardan katta yukni ham olib tashlashligini qayd etish mumkin.

Masalan, ilgari yangi turdagi hisobotni olish uchun bir necha kun, hatto, haftalar kutish kerak boʻlgan. Chunki ijrochi bir nechta quyi tizimlardan katta hajmdagi maʼlumotlarni qoʻlda toʻplash va qayta ishlashga majbur edi. Bunday manipulyatsiyalar koʻp vaqt va resurslarni talab qilardi. Endi DWH’ga asoslangan yangi texnologiyalar bilan ushbu vazifalar bir zumda juda kam kuch sarflab amalga oshiriladigan boʻldi.

Xavfsizlik nuqtayi nazaridan, platformada maʼlumotlarning xavfsizligini taʼminlash toʻrt darajada amalga oshiriladi.

Bugungi kunga kelib loyihaning birinchi bosqichi yakunlandi. Unga koʻra, Bankda asosiy manbalardan olingan barcha maʼlumotlarni toʻplash jarayoni avtomatlashtirilib, ularni integratsiya qilish jarayoni yakunlandi.

Keyingi bosqichda platformaning tahlil qismi sunʼiy intellekt (Artificial intelligence – AI), mashina oʻrganishi (Machine learning – ML) va katta maʼlumotlar (Big Data) kabi yanada ilgʻor usul hamda texnologiyalar asosida kengaytiriladi. Natijada, nafaqat anʼanaviy operatsion ichki va tashqi tizimlarning maʼlumotlari, balki ommaviy domenlar va ijtimoiy tarmoqlardan ham maʼlumotlarni olish imkoni yaratiladi.

– Ushbu platformaning ishga tushishi bilan Bank tahliliy faoliyatini birlamchi va tavsiflovchi darajadan prognoz qiluvchi darajaga koʻtaradi. Bu esa boshqaruv apparati va biznes yoʻnalishlar sunʼiy intellekt tomonidan oldindan tayyorlangan va hisoblab chiqilgan variantlarni qaror qabul qilish jarayoniga tatbiq eta oladi, – deydi Oʻzsanoatqurilishbank Boshqaruv raisi maslahatchisi Akmal Hamidov.

Shuningdek, maʼlumotlar omborining mavjudligi quyidagi global strategiyalarni amalga oshirish uchun asos boʻlib xizmat qiladi:

Hisobotlarni avtomatlashtiradi. DWH platformasi koʻpgina hisobotlarni oldindan belgilangan standart shablon boʻyicha avtomatlashtirishga imkon beradi. Bu esa, biznes boʻlinmalarning hisobot tayyorlash bilan bogʻliq ishlarini qisqartiradi va asosiy faoliyati uchun sezilarli vaqtni tejaydi.

Maʼlumotlar sifati va hisobotlar toʻgʻriligini taʼminlaydi. DWH platformasi maʼlumotlarni umumiy va standart formatlarga oʻtkazish funksiyasiga ega. Maʼlumotlar va hisobotlarni standartlashtirish bank boʻlimlariga hech qanday tafovutsiz oʻzaro taqqoslanadigan va yaxshi shakllangan natijalarni olish imkonini beradi.

Hisobotlar mustaqil tayyorlanishiga xizmat qiladi. DWH platformasi oddiy xodimlarga axborot texnologiyalari departamenti yordamisiz qoʻshimcha manbalarni talab qilmagan holda hisobotlarni yaratishga imkon berib, yuqori iqtisodiy samaradorlik kasb etadi.

Muxtasar aytganda, rivojlangan biznes tahlili yanada asoslantirilgan qarorlarni qabul qilishga yordam beradi. Bu, oʻz navbatida, har qanday biznes sohasida investitsiyalarning yuqori rentabelligi va risklarning past darajada boʻlishini taʼminlaydi.

Bank Axborot xizmati

Orqaga qaytish