Oʻzsanoatqurilishbank va “Commerzbank AG” oʻrtasida qoʻshimcha kelishuv imzolandi

Joriy yilning 2-may kuni Oʻzbekiston Respublikasi Prezidenti Shavkat Mirziyoevning Germaniya Federativ Respublikasiga rasmiy tashrifi doirasida Oʻzsanoatqurilishbank va “Commerzbank AG” oʻrtasida 100 million yevro miqdoridagi qoʻshimcha kelishuv tuzildi.

Davlatimiz rahbarining Germaniya Federativ Respublikasida davom etayotgan tashrifi doirasida Berlin shahrida ikki davlat ishbilarmon doiralarining biznes forumi boʻlib oʻtdi. Forumda oʻzaro manfaatli savdo-iqtisodiy hamkorlikning kengaytirilishiga qaratilgan qator muhim hujjatlar imzolandi.

Xususan, xalqaro ishbilarmonlik uchrashuvi Oʻzsanoatqurilishbankning “Commerzbank AG” bilan aloqalarini rivojlantirishda yangi imkoniyat eshigini ochdi.

Kelishuvga binoan ushbu xorijiy moliya muassasasidan jalb qilinadigan mablagʻlar kichik va oʻrta biznesni moliyaviy qoʻllab-quvvatlashga yoʻnaltiriladi.

Taʼkidlash joiz, Oʻzsanoatqurilishbank tizimida xalqaro hamkorlik borasida Germaniya bank-moliya tarmogʻi bilan sherikchilik munosabatlari tobora kengayib bormoqda.

Jumladan, Landesbank Baden-Vyurttemberg hamda “Helaba” banki bilan ham jami 100 million yevrolik kredit bitimlari imzolandi. Shu yilning 27-aprel kuni esa, mamlakatimizda boʻlib oʻtgan ikkinchi Toshkent xalqaro investitsiya forumida Germaniyaning “Helaba” banki bilan 35 mln. yevroga teng hamkorlik toʻgʻrisida kelishuv tuzilgan edi.

Biznes forumda tomonlar oʻzaro amalga oshirilayotgan ushbu kelishuvlar ikki davlat biznes doiralari oʻrtasida hamkorlikni kengaytirish hamda Oʻzbekistonda tadbirkorlik sohasini rivojlantirishga xizmat qilishini taʼkidladi.

Bank Axborot xizmati

Orqaga qaytish

1327

Boshqa yangiliklar