Yangiliklar

Oʻzsanoatqurilishbank va YETTB oʻrtasida 45 million dollarlik bitimlar imzolandi


09.06.2021

Oʻzsanoatqurilishbank va YETTB oʻrtasida 45 million dollarlik bitimlar imzolandi

Joriy yilning 9-iyun kuni Oʻzsanoatqurilishbank va Yevropa tiklanish va taraqqiyot banki oʻrtasida YETTBning “Yashil iqtisodiyotni moliyalashtirish mexanizmi” (“Green Economy Financing Facility”) va “Tavakkalchiliklarni taqsimlash mexanizmi” (“Risk Sharing Facility”) dasturlarida Oʻzsanoatqurilishbank ishtiroki boʻyicha bitimlarni imzolash marosimi boʻlib oʻtdi. Tadbir YETTB prezidenti birinchi oʻrinbosari Yurgen Rigterink rahbarligidagi delegatsiyaning mamlakatimizga tashrifi doirasida tashkil etildi.

“Green Economy Financing Facility” (GEFF) boʻyicha bitimga koʻra, YETTB xususiy qarz oluvchilarni qayta moliyalashtirish uchun hamkor banklarga kredit mablagʻlarni taqdim etmoqda. Ushbu mablagʻlar YETTBning yashil iqtisodiyotga oʻtish, issiqxona gazlari chiqishini qisqartirish va energiya samaradorligini oshirishga oid global strategiyasiga muvofiq iqlimga taʼsirni kamaytiruvchi loyihalarga yoʻnaltiriladi.

Xususan, Oʻzsanoatqurilishbank mijozlari tomonidan “yashil banking” mezonlari asosida amalga oshirilayotgan loyihalar uchun YETTB tomonidan 25 mln. AQSh dollarigacha boʻlgan miqdorda kredit liniyasini jalb qilish boʻyicha kelishuvga erishildi. Shuningdek, bank oldida qoʻyilgan vazifalarni sifatli bajarish maqsadida GEFF dasturi doirasida yashil iqtisodiyot yoʻnalishidagi sifatli loyihalarni muvaffaqqiyatli moliyalashtirish va eng maqbul yechimlarni taʼminlashda Oʻzsanoatqurilishbank xodimlariga texnik koʻmak koʻrsatish uchun mahalliy va chet ellik ekspertlarni jalb etishga alohida eʼtibor qaratilmoqda.

Maʼlumki, Oʻzbekiston Respublikasi Prezidentining 2019-yil 4-oktyabrdagi “2019-2030-yillar davrida Oʻzbekiston Respublikasining “yashil” iqtisodiyotga oʻtish strategiyasini tasdiqlash toʻgʻrisida”gi qaroriga muvofiq, mamlakatimizning 2019-2030-yillar davrida “yashil” iqtisodiyotga oʻtish strategiyasi tasdiqlangan. Hujjatga muvofiq, innovatsion “yashil” loyiha va investitsiyalar, xususan, “yashil” iqtisodiyotga bosqichma-bosqich oʻtishni koʻzda tutuvchi loyihalarni moliyalashtirishda xususiy sektorning faollashuvini qoʻllab-quvvatlash, shuningdek, Oʻzbekiston bank tizimi vakillarini “yashil” investitsiyalarni jalb etish borasida ragʻbatlantirish boʻyicha vazifalar belgilab berilgan.

Qayd etish lozimki, moliyaviy koʻmakning Xalqaro moliya korporatsiyasi hamda YETTB ishtirokidagi loyihalarni hayotga tadbiq etish jarayonida oʻziga xos yangi impulsga ega boʻlgan ushbu koʻrinishi Oʻzsanoatqurilishbank tizimida ancha yil avval Jahon banki hamkorligida joriy etilgan edi. Bugungi kunga qadar Bank tomonidan umumiy qiymati 91 mln. AQSh dollariga teng boʻlgan 20 ta “yashil” loyiha moliyalashtirildi.

GEFF dasturi doirasida jalb etilgan yangi kredit liniyasi Oʻzsanoatqurilishbank tomonidan kichik va oʻrta biznes hamda xususiy tadbirkorlik subyektlaridan tarkib topgan “yashil banking” ishtirokchilariga taqdim etilayotgan xizmatlar doirasini kengaytiradi, ishlab chiqarish va xizmat koʻrsatish sohasidagi tadbirkorlarning moliyalashtirishdan foydalanish imkoniyatini yanada oshiradi.

Risk Sharing Facility (RSF) dasturining maqsadi mamlakatda oʻrta va kichik tadbirkorlikning moliyalashtirishdan foydalanish imkoniyatini yaxshilashdan iborat. Dastur doirasida YETTB Oʻzsanoatqurilishbankning har bir taqdim etgan mijozlar loyihalari bilan bogʻliq boʻlgan riskni paritet prinsipi (birgalikda moliyalashtirish yoki kafolat berish orqali) asosida 7 yil muddatgacha oʻz zimmasiga olishga tayyor. Bunda YETTBning dasturdagi maksimal ishtirok miqdori 20 million AQSh dollarini tashkil etadi. Kreditlash shartlari Oʻzsanoatqurilishbank tomonidan YETTB bilan kelishilgan holda aniqlanadi. Kreditlarni boshqarish hamda monitoringini olib borish Oʻzsanoatqurilishbank tahlilchilarining saʼy-harakatlari orqali amalga oshiriladi. Kreditlash “Tavakkalchiliklarni taqsimlash mexanizmi” dasturi koʻmagida AQSh dollari va yevroda taqdim etiladi va shuningdek milliy valyutada kredit berishning potensial imkoniyatlarini nazarda tutadi.

Bankning RSF dasturidagi ishtiroki loyihaviy moliyalashtirish jarayonida risklarni taqsimlash hisobiga iqtisodiy kapitaldan samarali foydalanish va yuksak investitsion reytingga ega boʻlgan xalqaro moliyaviy muassasa tomonidan YETTBning kredit garovlarini qabul qilish, Oʻzsanoatqurilishbank mutaxassislarining kredit takliflarini shakllantirish, moliyaviy analiz (tahlil) va modellash, shuningdek, loyihalarni monitoring qilishda risklarni baholash boʻyicha koʻnikmalarini oshirish imkonini beradi.

Tadbir doirasida tomonlar Oʻzbekistondagi yashil loyihalarning amalga oshirilish holatini koʻrib chiqish bilan birga, respublikada yashil iqtisodiyotni moliyalashtirish jarayonlarini yanada rivojlanishtirish omillari hamda GEFF va RSF dasturlarining istiqbollarini muhokama qilishdi.

Bank Axborot xizmati





Boshqa yangiliklar


Oxirgi yangilanish sanasi: 09.06.2021 15:22

JOYDA - mobil banking

Telefoningizdagi qulay ilovadan foydalangan holda kunlik to’lovlarni amalga oshiring