Yangiliklar

Oʻzsanoatqurilishbankda transformatsiya: kichik va oʻrta biznes subyektlariga xizmat koʻrsatish yangi bosqichda


07.04.2022

Oʻzsanoatqurilishbankda transformatsiya: kichik va oʻrta biznes subyektlariga xizmat koʻrsatish yangi bosqichda

Joriy yilning 7-aprel kuni Milliy matbuot markazida Oʻzsanoatqurilishbank tizimida kichik va oʻrta biznes yoʻnalishida amalga oshirilayotgan transformatsiya jarayonlariga bagʻishlangan matbuot anjumani boʻlib oʻtdi. Tadbirda bank rahbariyati, tegishli tarkibiy boʻlinmalar masʼullari hamda ommaviy axborot vositalari xodimlari ishtirok etdi.

Kichik biznes va xususiy tadbirkorlik – mamlakatimiz iqtisodiyotining ustuvor yoʻnalishi. Soʻnggi besh yilda hukumatimiz tomonidan sohani rivojlantirishga qaratilgan 2 mingga yaqin qonun, farmon va qarorlar qabul qilindi.

Ushbu me’yoriy hujjatlarga asosan Oʻzsanoatqurilishbank tizimida ham koʻplab tartib-qoidalar soddalashtirildi, hujjatlarni rasmiylashtirish qisqartirildi, tadbirkorlikka har tomonlama keng imkoniyatlar yaratildi.

Aytish joizki, Bank tizimida 2018-yildan buyon xalqaro moliya institutlari bilan hamkorlikda amalga oshirilayotan transformatsiya jarayonida tadbirkorlik subyektlariga xizmat koʻrsatish tubdan takomillashtirildi.

Xalqaro moliya korporatsiyasi tavsiyalari asosida bankning butunlay yangi tashkiliy tuzilmasi joriy qilinib, bank mijozlari 3 turdagi (korporativ, kichik va oʻrta biznes hamda chakana biznes) segmentlarga, shuningdek, kichik va oʻrta biznes subyektlari ham alohida subsegmentlarga (mikro, kichik va oʻrta segmentlar) ajratildi.

Mijozlarning bank mahsulot va xizmatlari yuzasidan fikr va mulohazalari, muammo va takliflarini oʻrganish maqsadida turli tahlillar oʻtkazildi. Oʻrganishlar natijasi umumlashtirilib, shu yilning oʻzida birgina kichik biznes va xususiy tadbirkorlik subyektlari uchun 13 ta kredit mahsuloti, 2 ta xizmatlar paketi hamda kassa hisob amaliyotlari uchun 1 ta mahsulot amaliyotga joriy etildi.

Anjumanda bu borada Bankning Buxoro mintaqaviy filialida amalga oshrilgan ishlar misol tariqasida keltirib oʻtildi.

– Transformatsiya jarayonlarining soʻnggi bosqichidagi eng muhim yoʻnalish – bu filiallarda xizmat koʻrsatishni mijozga yoʻnaltirilganlik tamoyili asosida yoʻlga qoʻyish, – deydi “Oʻzsanoatqurilishbank” ATB Kichik va oʻrta biznes departamenti boʻlim boshligʻi Habibullo Atanazarov. – Buxoro mintaqaviy filialida mijozlarga xizmat koʻrsatish boʻyicha ish uslubi va biznes modeli butunlay yangidan tashkil etildi. Mijozlarga mijozbay xizmat koʻrsatish maqsadida biznes menejer va universal servis menejerlaridan tashkil topgan front ofis xodimlari faoliyati yoʻlga qoʻyildi. Buning natijasida bankimizda kredit ajratish tezkorligi yuridik shaxslar uchun 2,6 barobarga, mijozlar soni 12 foizga, masofaviy bank xizmat turlaridan foydalanuvchilar soni esa 115 fozga oʻsdi.

Tadbirkorlar oʻrtasida oldindan limit belgilash orqali aylanma mablagʻni toʻldirishga kredit olishi mumkin boʻlgan potensial mijozlarni aniqlash algoritmi ishlab chiqildi.

Kichik va oʻrta biznes hamda mikrosegment subyektlarini skoring tahlildan oʻtkazish orqali tezkor kredit ajratish loyihasi ishlab chiqildi. Mikrosegment uchun skorkarta loyihasi yaratildi.

Kredit olish uchun arizalar Bankning rasmiy veb sayti orqali onlayn tarzda qabul qilinishi yoʻlga qoʻyildi. Mijozlar, shuningdek oʻz arizalari holatini onlayn kuzatib borish, hisob raqam ochish, korporativ karta va terminallarga buyurtma berish imkoniga ega boʻlishdi.

Anjumanda ayni paytda bank tizimida tadbirkorlarga sifatli va tezkor xizmat koʻrsatish hamda kreditlash jarayonini avtomatlashtirish maqsadida yana qator dasturlar joriy etilayotgani maʼlum qilindi. Xususan, masofaviy xizmatlar sonini oshirish maqsadida 71 ta bank amaliyotlarini oʻzida jamlagan “SQB Business” dasturi ishga tushirilmoqda.

Mijozlarga bankning istalgan tarmogʻidan xizmat koʻrsatishni yoʻlga qoʻyish maqsadida yagona MFO tizimini joriy qilish ishlari faol davom ettirilmoqda. Bugungi kunda Buxoro viloyatidagi barcha filiallar hamda Toshkent shahridagi Yunusobod filiali ushbu tizimga muvaffaqiyatli oʻtkazildi.

Bank tizimida savdo va pullik xizmat koʻrsatish faoliyati bilan shugʻullanuvchi tadbirkorlik subyektlari faoliyatini qoʻllab-quvvatlash hamda aholiga qulayliklar yaratish maqsadida QR-Online kontaktsiz toʻlov tizimi joriy etildi.

Bundan tashqari, ayni paytda “Tap to Phone” moduli orqali toʻlovlarni qabul qilish amaliyotini yoʻlga qoʻyish ishlari olib borilmoqda. Tadbirda yangi NFC tizimida ishlovchi mazkur dastur bank savdo terminallaridan foydalanuvchi tadbirkorlarga qoʻshimcha qulaylik yaratishi taʼkidlandi.

Mijozlar toʻgʻrisidagi barcha maʼlumotlarni bir bazada shakllantirib borish hamda bank xizmatlari va mahsulotlarini ularning talabidan kelib chiqqan holda taklif etish maqsadida CRM tizimi yoʻlga qoʻyilmoqda.

Bank amaliyotlari, xususan, xizmat koʻrsatish bilan bogʻliq 600 dan ortiq biznes jarayonlar “Visio” dasturida shakllantirildi. Bankning malakali xodimlari tomonidan 350 dan ortiq biznes jarayonlarni optimallashtirish hisobiga yaratilgan mazkur baza muassasaga endi ishga qabul qilingan va boshqa lavozimga oʻtkazilgan mutaxassislar uchun texnik oʻquv qoʻllanma sifatida asqotmoqda.

Bank Axborot xizmati





Boshqa yangiliklar


Oxirgi yangilanish sanasi: 07.04.2022 17:13

JOYDA mobil ilovasi

Smartfondagi qulay ilova yordamida kunlik to'lovlarni amalga oshiring

playmarketappstore

up