O‘zsanoatqurilishbankning yana ikkita Bank xizmatlari markazi ochildi

Bugun, 2019-yil 10-aprel kuni O‘zsanoatqurilishbankning Qashqadaryo va Xorazm mintaqaviy filiallari qoshida Bank xizmatlari markazi ochilish marosimi o‘tkazildi.

Urganch hamda Qarshi shahrida faoliyatini boshlagan O‘zsanoatqurilishbank Bank xizmatlari markazlari ilg‘or axborot kommunikatsiya texnologiyalari hamda zamonaviy mebellar bilan jihozlangan. Ularda malakali bank xodimlari yuridik va jismoniy shaxslarga keng ko‘lamli bank va konsalting xizmatlarini ko‘rsatadi.

Markazlarda mijozlar uchun hisob raqam ochish va kredit olish uchun ariza berish, onlayn omonatni rasmiylashtirish, barcha turdagi to‘lovlar hamda xalqaro pul o‘tkazmalarini amalga oshirish imkoniyati yaratilgan.

Zamonaviy bankomat va infokiosklar 24/7 rejimida ishlaydi. Bu milliy va xalqaro plastik kartalardagi mablag‘larni naqdlashtirish, kommunal, uyali aloqa operatorlari, shahar telefonlari, kabel televideniyesi, internet xizmati uchun to‘lovlarni haftaning istalgan kuni, sutkaning istalgan vaqtida amalga oshirish imkonini beradi.

Qayd etish kerak, O‘zsanoatqurilishbank tizimida mijozlarga xizmat ko‘rsatish zamonaviy yondashuvlar asosida takomillashtirilmoqda. Maqsad - iste’molchilar manfaatlarini to‘la qanoatlantirish, xususan, ularga yanada yaqinlashish, jahon standartlari darajasida xizmat ko‘rsatish, yangi bank xizmatlari va mahsulotlarini o‘z vaqtida yetkazib, tadbirkorlar hamda aholining mazkur turdagi xizmatlarga bo‘lgan talabini to‘liq qondirishdan iboratdir.

Eslatib o‘tamiz, O‘zbekiston Respublikasi 2018-yil 23-martdagi “Bank xizmatlari ommabopligini oshirish bo‘yicha qo‘shimcha chora-tadbirlar to‘g‘risida”gi qarori ijrosi doirasida tashkil etilayotgan mazkur markazlarning birinchisi joriy yil mart oyida Bankning Chilonzor filiali qoshida ochilgan edi.

Bank Axborot xizmati

Orqaga qaytish

2507

Boshqa yangiliklar