Qurilish materiallari ishlab chiqarish sohasida aholi murojaatlari tizimli oʻrganilmoqda

Axborot va ommaviy kommunikatsiyalar agentligida “Oʻzsanoatqurilishmateriallari” uyushmasi hamda Oʻzsanoatqurilishbank hamkorligida qurilish materiallari ishlab chiqarish sohasida aholi murojaatlariga bagʻishlangan brifing oʻtkazildi.

Brifingda joriy yilning birinchi choragida “Oʻzsanoatqurilishmateriallari” uyushmasiga jismoniy va yuridik shaxslardan jami 21 ta murojaat kelib tushgani taʼkidlandi.

Jumladan, Oʻzbekiston Respublikasi Prezidenti virtual qabulxonasi orqali 17 ta hamda bevosita uyushmaga 4 ta murojaat yoʻllangan. Shundan virtual qabulxonaga kelib tushgan murojaatlarning 5 tasi qanoatlantirilgan, 2 tasiga tushuntirish berilgan, qolgan 10 tasi tegishliligi boʻyicha boshqa tashkilotlarga yuborilgan.

Bevosita uyushmaga kelib tushgan murojaatlarning esa, 2 tasi qanoatlantirilgan, yana 2 tasi tegishliligi boʻyicha boshqa tashkilotlarga yoʻnaltirilgan.

Tahlillarga koʻra, murojaatlarning 47 foizi uyushma tizimidagi yirik ishlab chiqaruvchi korxonalarga ishga kirish va tiklash, 24 foizi ish haqi, moddiy yordam, kompensatsiyalar kabi ijtimoiy toʻlovlar haqida, qolgan qismi esa, shikoyat ruhidagi masalalardan tarkib topgan.

Brifingda ushbu tahlillar asosida uyushma hamda tarmoq tashkilotlari bilan birgalikda murojaatlarni tizimli oʻrganib, qonuniy hal etish yuzasidan doimiy ravishda chora-tadbirlar amalga oshirilayotgani qayd etildi.

Ijro intizomi xususida toʻxtalinib, hisobot davrida “Oʻzsanoatqurilishmateriallari” uyushmasi zimmasiga yuklatilgan 12 ta topshiriqning barchasi oʻz muddatida bajarilgani aytib oʻtildi.

Bank Axborot xizmati

Orqaga qaytish

1312

Boshqa yangiliklar