S&P Global Ratings Oʻzsanoatqurilishbankning kredit reytingi prognozini oshirdi

Standard & Poor’s Global Ratings xalqaro reyting agentligi Oʻzsanoatqurilishbankning “BB-” reyting darajasini tasdiqlab, kredit reytingi prognozini “salbiy”dan “barqaror”ga oshirdi.

Barqaror prognoz bankning rezervlarni shakllantirishda qoʻshimcha muhim ehtiyojlar yoki kreditlashning haddan ziyod ortib ketishi bilan bogʻliq holda tavakkalchiliklar pasayishiga koʻra kapitallashuvning adekvat koʻrsatkichlarini saqlab qolishiga asoslanadi. 

S&P Global Ratings tomonidan qayd etilishicha, 2024-yilda amalga oshirilishi koʻzda tutilgan xususiylashtirish jarayonlariga tayyorgarlikka qaramasdan, kelgusi ikki yilda bank oʻzining mustahkam biznes-pozitsiyasi hamda davlat bilan yaqin aloqalarini saqlab qoladi. 

Pandemiya bilan bogʻliq iqtisodiy tahdidlar sharoitida Oʻzsanoatqurilishbank kredit reytingi prognozining koʻtarilishi moliya muassasasi biznesining samarali rivojlanayotgani, bank aktivlarining barqaror oʻsib borayotgani va yuqori sifatliligi, shu bilan birga faoliyatidagi samarali operatsion koʻrsatkichlaridan dalolat beradi.  

“Oʻzsanoatqurilishbank reytinglari boʻyicha “barqaror” prognoz Oʻzbekistonda kapitalning adekvat zaxiralari, aktivlar sifatining yaxshilanishi va mustahkam biznes-pozitsiya bank kreditlash koʻrsatkichlarini yaqin 12 oy ichida saqlab qolishini taʼminlaydi”, – deya xulosa qiladi, Standard & Poor’s. 

Oʻzsanoatqurilishbank Oʻzbekiston Respublikasining eng yirik va tizimli moliya muassasalaridan biridir. Bank aktivlar va kapitallar hajmi, depozit baza va daromad kabi asosiy moliyaviy koʻrsatkichlar boʻyicha yetakchi oʻrinlarni egallab kelmoqda. Bugungi kunda bank tizimida transformatsiyalash jarayonining soʻnggi bosqichini yakunlash boʻyicha keng koʻlamli ishlar olib borilmoqda. Bu, oʻz oʻrnida, bankning moliyaviy koʻrsatkichlari hamda operatsion samaradorlikning yuksalishiga ijobiy taʼsir koʻrsatadi. 

Oʻzsanoatqurilishbank oʻzining mamlakat moliya bozoridagi oʻrnini mustahkamlab, investorlik bazasini kengaytirib bormoqda. 

Bank Axborot xizmati

Orqaga qaytish

1808

Boshqa yangiliklar