Tadbirkorlar bilan qishloq xo‘jaligida daromad orttirish imoniyatlari muhokama qilindi

            O‘zsanoatqurilishbank Boshqaruvi Qoraqalpog‘iston Respublikasining Beruniy tumanida tadbirkorlar bilan uchrashuv o‘tkazdi. Unda mahalliy ishbilarmonlar bilan chorva ozuqasini yetishtirishni rivojlantirish va qo‘shimcha mahsulot ishlab chiqarishning yangi imkoniyatlari muhokama qilindi.

            Prezidentimiz raisligida shu yil 30-yanvar kuni tomorqada va ijaraga berilgan ekin yerlarida daromadli mahsulot yetishtirishning yangi tizimiga bag‘ishlangan yig‘ilish bo‘lib o‘tdi.

            Yig‘ilishda tijorat banklariga qishloq xo‘jaligi sohalarini qo‘llab-quvvatlash, ulardagi mavjud muammolarni aniqlash va yechimi bo‘yicha takliflar asosida bazaviy tumanlarni tanlash topshirig‘i berildi.

            O‘zsanoatqurilishbank tomonidan ushbu yo‘nalishda keng ko‘lamli ishlar boshlab yuborildi. Xususan, 2025-yilda 63 ming aholini ish bilan ta’minlash va chorva ozuqasi eksport hajmini 43 mln. AQSh dollariga yetkazish rejalashtirilmoqda.

            Sabzavot ko‘chatlarini yetishtirish hamda chorva ozuqasi sohasini rivojlantirish bo‘yicha tanlab olingan bazaviy tumanlardan biri - Beruniyda Bank boshqaruvi raisi o‘rinbosari Sanjar Abduvaliyev boshchiligida mahalliy tadbirkorlar bilan uchrashuv tashkil etildi.

            Ochiq muloqot ruhida o‘tgan tadbirda yaratilayotgan yangi imkoniyatli, qulay sharoitlar va ulardan foydalanish yo‘llari xususida so‘z yuritildi. Qishloq xo‘jaligi mahsulotlarini yetishtirishdagi mavjud muammolar o‘rganilib, ularni hal etish, tarmoqni zamonaviy yondashuvlar va ilg‘or agrotexnologiyalar asosida rivojlantirish masalalari muhokama qilindi.

            “Birgalikdagi sa’y-harakatlarimiz nafaqat mamlakatning agrar sohadagi raqobatbardoshligini ta’minlaydi, balki bandlik darajasini oshiradi, tadbirkorlar uchun milliy “brend” yaratib, xalqaro bozorlarga chiqishga keng yo‘l ochadi”, dedi Sanjar Abduvaliyev.

            Uchrashuv doirasida, shuningdek, tadbirkorlarning masalalarini joyiga chiqib o‘rganishlar ham o‘tkazildi.

Bank axborot xizmati

Orqaga qaytish

1513

Boshqa yangiliklar