Oʻzsanoatkurilishbank tizimida korrupsiyaga qarshi kurashish xalqaro standartlarda yoʻlga qoʻyilgan

Oʻzsanoatqurilishbank tomonidan korrupsiyaning oldini olish va unga qarshi kurashish, korrupsion holatlarni keltirib chiqaruvchi omillarga chek qoʻyishga qaratilgan tizimli ishlar yoʻlga qoʻyilgan. Bu borada Oʻzbekiston Respublikasining “Korrupsiyaga qarshi kurashish toʻgʻrisida”gi qonuni va boshqa qator meyoriy hujjatlar dasturilamal boʻlmoqda.

Jumladan, korrupsiyaga qarshi kurashish boʻyicha alohida tuzilma tashkil etildi. Xorijiy ekspertlar bilan hamkorlikda xalqaro standartlar asosida ishlaydigan anti-korrupsion tizim joriy qilindi. Korrupsiyaga oid harakatlar haqida axborot berish uchun Komplayens ishonch liniyalari ishga tushirildi. Bankning Toshkent shahri va barcha hududiy tarmoqlarida komplayens nazorat xodimlari faoliyati yoʻlga qoʻyildi.

Korrupsiyaga qarshi kurashish agentligi bilan oʻzaro hamkorlik memorandumi imzolanib, “yoʻl xaritasi” belgilab olindi.

Natijada, 2022-yilning iyun oyida bank tomonidan Korrupsiyaga qarshi kurashish menejment tizimi boʻyicha ISO 37001:2016 xalqaro standart sertifikati qoʻlga kiritildi. Bunday sertifikat, shuningdek, muassasaning hududiy tarmoqlariga ham taqdim etildi.

Bugungi kunda bank tomonidan ushbu yoʻnalishdagi oʻndan ziyod ichki hujjatlarga oʻzgartish va qoʻshimchalar kiritildi, zaruratga koʻra yangi meyoriy hujjatlar ishlab chiqildi. Bosh bank va hududiy tarkibiy boʻlinmalar faoliyati oʻrganilib, mavjud kamchiliklarni bartaraf etish yuzasidan chora-tadbirlar belgilandi. 4 mingdan ziyod xodimlar uchun korrupsiyaga qarshi kurashish menejment tizimi talablari boʻyicha seminar va treninglar tashkil etilib, ular test sinovlaridan oʻtkazildi. 30 nafar xodim Xalqaro komplayens assotsiatsiyasi (ICA, Buyuk Britaniya) tomonidan tashkil etilgan oʻquv kurslarida qatnashib, xalqaro sertifikatga ega boʻldi.

Shuningdek, joriy yilning birinchi yarmida bank tizimidagi barcha xodimlar tomonidan korrupsiyaga qarshi kurashish siyosatiga muvofiqlik deklaratsiyasi qabul qilinib, manfaatlar toʻqnashuvini boshqarish toʻgʻrisidagi nizom talablariga muvofiqligi tahlil etildi.

Bosh bank va hududiy tarkibiy boʻlinmalar, bank taʼsischiligi va ishtirokida tashkil etilgan shoʼba korxonalarda korrupsiyaga qarshi tartib-taomillarning samaradorligini aniqlashga qaratilgan monitoring oʻtkazildi. Aniqlangan kamchiliklarni bartaraf etish boʻyicha chora-tadbirlar ishlab chiqildi.

Joriy yilning iyun oyida “Cert International” tashkiloti tomonidan Bosh bank va uning hududiy tarkibiy boʻlinmalari birinchi tashqi kuzatuv audit jarayonlaridan oʻtkazildi. Tekshiruv natijalari bankning ushbu yoʻnalishdagi faoliyati ISO 37001:2016 xalqaro standart talablariga muvofiqligini yana bir bor tasdiqladi.

Oʻzsanoatqurilishbank tizimidagi “Komplayens ishonch liniyasi”ga quyidagi aloqa tarmoqlari orqali bogʻlanishingiz mumkin:

Telefon: 0-800-120-88-88;

Bankning rasmiy veb-saytida joylashtirilgan maxsus shakl: https://sqb.uz/uz/anticorruption/;

Telegram messenjerida yaratilgan maxsus bot:@sqbantikor_bot.

Orqaga qaytish

1740

Boshqa yangiliklar