“SQB Math Olympiad – 2023” gʻoliblari aniqlandi

Joriy yilning 17-iyun kuni Oʻzsanoatqurilishbank tomonidan oliy taʼlim muassasalari talabalari hamda tijorat banklari xodimlari oʻrtasida mantiqiy matematika yoʻnalishida tashkil etilgan “SQB Math Olympiad – 2023” olimpiadasining yakuniy bosqichi boʻlib oʻtdi. Gʻoliblar umumiy hisobda 100 million soʻm mukofot puli bilan taqdirlandi.

“SQB Math Olympiad – 2023” Prezidentimizning 2020-yil 7-maydagi “Matematika sohasidagi taʼlim sifatini oshirish va ilmiy-tadqiqotlarni rivojlantirish chora-tadbirlari toʻgʻrisida”gi qarori asosida matematika sohasidagi taʼlimni qoʻllab-quvvatlash, ilmni rivojlantirishga oid loyihalarda bank ishtirokini taʼminlash hamda iqtidorli yoshlarni aniqlab, ularga moddiy va maʼnaviy motivatsiya berish maqsadida tashkil etildi.

Joriy yilning 29-aprel kuni olimpiadaning saralash bosqichi oʻtkazilib, 403 nafar ishtirokchi final yoʻllanmasini qoʻlga kiritgan edi.

Oʻzbekiston Milliy universiteti Matematika fakultetida oʻtkazilgan final bosqichida ular 10 ta muammoli masala (3 balldan), 10 ta tanqidiy fiklash (3,1 balldan) hamda 10 ta IQ test (3,9 balldan) sinovlaridan oʻtkazildi.

Natijalar talabalar va bank tizimi xodimlari oʻrtasida alohida-alohida aniqlandi. Unga koʻra, 1-oʻringa 4 nafar (shundan 2 nafari talaba), 2-oʻringa 8 nafar (shundan 5 nafari talaba) hamda 3-oʻringa 12 nafar (7 nafari talaba) ishtirokchilar munosib deb topildi.

Barcha gʻoliblar mos ravishda 5 800 000, 4 500 000 va 3 400 000 soʻm pul mukofotlari bilan taqdirlandi.

Loyiha doirasida Oʻzsanoatqurilishbank va Al-Xorazmiy Xalqaro olimpiada (Khiso) maktabi hamkorligida mantiqiy matematika masalalari kitobi nashr qilindi. Gʻoliblarni taqdirlash marosimida ishtirokchilarga ushbu kitob ham taqdim etildi.

Taʼkidlash joiz, “SQB Math Olympiad – 2023” oʻtkazishda Oʻzbekiston Respublikasi Oliy taʼlim, fan va innovatsiyalar vazirligi, Fanlar akademiyasining V.I.Romanovskiy nomidagi matematika instituti hamda Khiso maktabi yaqindan koʻmak berdi.

Bank Axborot xizmati

Orqaga qaytish

2412

Boshqa yangiliklar